(Reportajen Estaziadu Mariano Abi/Editor Mateus da Cruz)
Dili (Timor Post) – Tanba enfrenta problema bee moos, Eskola Báziku Sentrál (EBC sigla Portugés) Públiku Palaban, Sub-Rejiaun Pante Makasar, RAEOA, implementa obrigatóriu ba estudante sira tenke lori bee moos hosi ida-idak nia uma hodi te’in iha Eskola.
“Relasiona ho agora daudaun merenda eskolár ninian, ami nia bee moos la iha, entaun obrigatóriu estudante tenke lori husi uma, semana ida lori masa dala rua,” dehan Diretór EBC Palaban, Vicêncio Cono, Via Telefone ba Timor Post, Segunda (23/05).
Nia hatete, bainhira bee moos laiha professor sira tau hamutuk osan hamutuk hodi sosa, semana ida dala ida. Profesór sira sosa litru 8000, ho 20 USD kada litru.
Iha eskola ne’e lor-loron estudante sira konsumu Ai-han lokál maibé Ministériu Edukasaun Juventude no Desportu (MEJD), mós aloka osan ba foos no produtu lokál.
“Maski nesesidade báziku sa’e, maibé merenda eskolár la’o nafatin, ho orsamentu ne’ebé MEJD aloka mai iha EBC Palaban hamutuk 4128 USD, ba estudante hamutuk 688 iha eskola refere,” nia relata.
Entretantu Diretór Servisu Ministériu Edukasaun Munisípiu Vikeke, Egidio Amaral, informa, iha Munisípiu Vikeke, Eskola Ensinu Báziku hamutuk 18 no estudante kuaze 26 mill ital mak asesu ba merenda eskolár.
“Ami iha munisípiu Vikeke merenda eskolár foin hahú iha dia 19 fulan Maiu 2022, durante fulan sanulu nia laran,” nia dehan.
Total orsamentu ne’ebé maka aloka ba merenda eskolár hamutuk 186, 760 USD. Orsamentu ne’e durasaun ba fulan sanulu, hahú Fulan Maiu To’o Fevereiru 2023. (Lee Notísia Seluk Iha Jornál Timor Post/ Asesu You Tube Timor Post)
794 total views, 6 views today
Bele hare Video Seluk :
Subscribe to Timorpost
