(Reporten Jeremias Soares/Editor Mateus da Cruz)
DILI—Grupu Korál Brilha Akadémika Universidade Nasionál Timor Lorosa’e (UNTL) hetan konvite husi komisaun organizadora atu hananu Hino Nasionál iha ámbitu serimónia investidura Prezidente Repúblika eleitu José Manuel Ramos Horta.
Hino Nasionál ne’ebé hananu husi grupu korál Brilha Akadémika akompaña ho mini orkestra. Kompozisaun husi grupu korál Brilha Akadémika mak estudante husi Fakuldade Sia (9) UNTL nian ne’ebé kompostu husi ema na’in-haatnulu (40) no tokadór na’in ualu husi Sentru Estudu Kultura no Arte, Xefia husi doutór Visente Paulino.
Husi estudante na’in-haatnulu (40) nee, feto hamutuk ruanulu resin haat (24) no mane na’in sanulu resin neen (16). Dirijente ba Grupu Korál Brilha Akadémika UNTL nian mak Enjeñeiru Fidelis Xavier Pereira, maski enjeñeiru iha area Jeolojia nian, maibé iha mós abilidade ne’ebé aas hanesan dirijente ba korál.
Preparasaun (Ensaiu) ba eventu Serimónia Investidura ba PR eleitu hala’o durante semana rua iha UNTL. Gabinete Vise Reitora ba asuntu Estudantis, UNTL neebé lidera husi enjeñeira Lígia Tomás Correia ho kolaborasaun servisu konjunta husi Gabinete Sentru Estudu Kultura no Arte, Vise Reitór ba Asuntu Administrasaun, Finansas no Administradór Jerál, Diretór Jerál Ápoiu Reitoria, Diresaun Lojístika no mós Mídia UNTL.
“Ensaiu jerál iha Tasi-tolu hala’o durante loron tolu iha dia 16 too 18 husi tuku hitu kalan too tuku sanulu resin rua ho objetivu atu armoniza preparasaun (ensaiu) husi unidade hotu-hotu ba iha serimónia Investidura ba PR eleitu. Informa Vise Reitora ba Asuntu Estudantis iha nia Gabinete ba Timor Post iha kampus sentrál UNTL, Kuarta (18/05).
UNTL nuudar universidade estatál sente orgullu tanba hetan oportunidade atu aprezenta rekursu akadémiku (estudante sira) neebé kualifikadu husi parte korál nian. Afirma Vise Reitora ne’e.(Lee notisia seluk iha Timor Post/Asesu You Tube Timor post)
1,107 total views, 6 views today
Bele hare Video Seluk :