(Reportajen Jaime Pires/Editor Mateus da Cruz)
DILI (Timor Post)- Konsellu Ministru (KM), aprova projetu Dekretu-Lei hodi harii Sekretáriu Estadu foun ida hodi haree ba sidadaun sira ne’ebé mak iha rai li’ur hanesan iha Inglaterra, Irlanda do Norte, Austrália, Korea inklui mós Indonézia.
Projetu Dekretu-Lei, ne’e aprezenta husi Primeiru-Ministru, Taur Matan Ruak, kona-ba alterasaun datoluk ba Dekretu-Lei nu. 14/2018, loron 17 fulan Agostu, kona-ba orgánika Governu Konstitusionál VIII no ba alterasaun daruak ba Dekretu-Lei nu. 20/2019, loron 31 fulan Jullu, kona-ba Orgánika Ministériu Negósiu Estranjeiru no Kooperasaun.
“Kria Sekretáriu Estudu ida ne’e atu haree ba ita nia sidadaun sira iha rai li’ur iha mundu tomak, hanesan Inglaterra, Irlanda do Norte, Austrália, Korea inklui mós Indonézia, atu nune’e sira labele sente mesak maibé iha Governu ida sempre hamutuk ho sira,” dehan Ministru Prezidensiál Konsellu Ministru Fidelis Magalhães iha Palasiu Governu, Segunda (16/05).
Nia hatete, Alterasaun ba Dekretu-Lei nu. 14/2018, loron 17 fulan Agostu ida ne’e ho objetivu atu integra iha kompozisaun Governu Konstitusionál VIII, Sekretáriu Estadu Komunidade Timoroan iha Rai Li’ur.
“Ho integrasaun Sekretáriu Estadu Komunidade Timoroan iha Rai-Li’ur iha kompozisaun Governu Konstitusionál VIII, ne’ebé rekoñese nesesidade no importánsia atu asegura hodi hametin lasu komunidade timoroan iha rai-li’ur ho komunidade nasionál, nune’e mós urjénsia atu asegura mekanizmu ne’ebé efikás liu atu envolve sidadaun ne’ebé hela no serbisu iha rai-li’ur iha prosesu dezenvolvimentu país nian,” nia hatete.
Aleinde ne’e, hala’o mós liuhusi diploma ne’e, alterasaun daruak ba Dekretu-Lei nu.20/2019, loron 31 fulan Jullu, kona-ba orgánika Ministériu Negósiu Estranjeiru no Kooperasaun, ho forma atu garante armonizasaun ida-ne’e ho lei orgánika governu nian.(Lee notisia seluk iha Timor Post/Asesu You Tube Timor post)
1,115 total views, 3 views today
Bele hare Video Seluk :
Subscribe to Timorpost
