(Reportajen Jaime Pires/Editor Mateus da Cruz)
DILI (Timor Post)- Vise-Ministru Interior António Armindo ho nia grupu Heroi, halo lansamentu dahuluk ba sira nia múzika ho nia títulu Inan Heroi iha Timor-Leste.
“Ami husi grupu Heroi ami foin atu lansa ami nia múzika ida ne’ebé ami produz, múzika ne’e hanensan reflesaun ida hodi dignifika ba ita nia inan heroi sira ne’ebé fó sira nia kontribuisaun hodi luta ba ukun rasik-an,” nia dehan bá jornalista sira hafoin halo lansamentu dahuluk ba sira nia múzika iha INCANTO Lesidere, Sesta (06/05).
Nia hatete, durante ne’e múzika barak mak ema produz ne’e halai barak liu ba aman sira ne’ebé mak halo funu, tanba ne’e sira nia ekipa hakarak produz fali múzika ida hodi halo reflesaun no dignifika ba inan sira ne’ebé mak fó kontribuisaun hodi luta ba ukun rasik-an.
“hanesan ita nia inan sira Maria Tapo, Maria Bisoi, Maria Bui Mesak no sira seluk ne’ebé mak ami la temi ida-ida, múzika ne’e espesiál ba inan sira ne’ebé mak durante luta ba ukun rasik an,” nia dehan.
Liu husi múzika ida ne’e grupu Heroi hakarak fó prezente murak ida ne’e ba inan luta na’in sira hotu iha Timor-Leste laran tomak, tanba iha fulan Maiu ne’e mós hanesan fulan Rosario ba inan Maria Virjen.
“Ami iha grupu ida ne’e hamutuk na’in haat, ha’u mak hanesan inisiadór ba múzika ida ne’e, ha’u nia kolega Abio Salsinha ho Sico Ramelau maka hanesan kompozitór no aranzamen mak kolega Arsen,” dehan t an.
Múzika ne’e sei ba fa’an iha merkadu, inklui iha Youtube. Nune’e mós iha Komemorasaun Loron Restaurasaun Independénsia 20 de Maiu iha Tasi-Tolu, grupu Heroi sei aprezenta no kanta iha konsertu (19/05) kalan.
Atual Vice Ministru Interior ne’e hatete, grupu ne’e sei la para de’it iha ne’e maibé sei kontinua nafatin hodi produz tan múzika sira seluk tuir mai.(Lee notisia seluk iha Timor Post/Asesu You Tube Timor post)
1,047 total views, 3 views today
Bele hare Video Seluk :