(Reportajen Jaime Pires/Editor Mateus da Cruz)
DILI (Timor Post)- Komandu Polisia Nasionál Timor Leste, Munisípiu Dili, halo operasaun iha Kuarta (04/05) kalan, prende motorizada hamutuk-53, iha fatin rua.
Operasaun ne’e halo atu segura situasaun jerál iha Munisípiu Dili hodi prepara ba komemorasaun loron Restaurasaun Independénsia 20 de Maiu ne’ebé mak sei realiza iha Tasi-Tolu.
Hafoin halo operasaun Komandu fahe kedas ekipa balun la’o ain tama sai bairru iha kapitál Dili no balun ho karreta halo patrullamentu no kria tránzitu halo pasa revista hodi buka ema ne’ebé ho motor ka karreta lori sasán kro’at ka kontra sinais tránzitu nian.
Iha kalan ne’e, ekipa tránzitu halo pasa revista iha fatin rua mak hanesan, iha Hudi-Laran Bairopite nia, enkuantu ida seluk halo iha Portu-Dili nia oin.
Enkuantu iha Hudi-Laran prende motorizada hamutuk-27 no iha Portu-Dili nia oin, prende hamutuk-25 nune’e total motorizada hamutuk 53 mak hetan prende iha operasaun kalan ne’e.
Motorizada sira ne’ebé mak ekipa Unidade Tránzitu prende ne’e tanba kontra sinais tránzitu hanesan la tau xapa matríkula kompletu, la uza espellu, balun la taka Helm no balun dokumentu laiha no la kompletu.
Motorizada sira ne’e lori kedas ba Komandu PNTL Munisípiu Dili, Kaikoli, hafoin ba selu multa na’in sira bele ba hasai fali.
Operasaun ne’e PNTL Munisípiu Dili, sei kontinua halo hahú husi ohin no sei termina iha loron (18/05) molok komemora loron Restaurasaun Independénsia 20 de Maiu.
Iha operasaun ne’e Komandu Munisípiu Dili, hetan mós apoiu husi Unidade Polísia Maritima (UPM) no Unidade Patrullamentu Fronteira (UPF). (Lee Notísias Seluk Iha Jornál Timor Post/ Asesu You Tube Timor Post)
652 total views, 3 views today
Bele hare Video Seluk :