(Reportajen Jaime Pires/Editor Mateus da Cruz)
DILI (Timor Post)- Mundu tomak no Timor-Leste, ohin, 01 fulan Maiu tinan 2022, selebra Loron Internasionál Traballadór nian, iha selebrasaun ne’e, Primeiru Ministru (PM), Taur Matan Ruak, dehan, Traballadór nu’udar eroi foun ba dezenvolvimentu Nasionál iha Timor-Leste.
“Traballadór sira nu’udar eroi foun sira iha faze dezenvolvimentu nasionál daudaun ne’e nian no liu husi sira mak ita harii Nasaun ida ne’ebé Forte, Riku no Seguru,” dehan Taur liuhusi nia mensajen ne’ebé mak Timor Post hetan, relasiona ho komemorasaun loron Traballadór mundiál, Domingu (01/04) ne’e.
Taur hatete, Loron Traballadór nian la’ós de’it feriadu ka loron deskansa nian ida, maibé sai nu’udar biban ida ne’ebé di’ak tebetebes atu hahí empeñu, méritu, dixiplina, profisionalizmu, servisu iha ekipa, espíritu sakrifísiu nian no kumprimentu devér nian, ne’ebé horik nafatin iha traballadór sira, tantu nasionál nune’e mós estranjeiru sira, ne’ebé belar iha setór oioin husi ekonomia no administrasaun públika, ne’ebé kontribui maka’as ba produtividade atu País hakat ba oin iha ritmu ne’ebé di’ak.
Tanba Traballadór sai nu’udar bénsaun no rikusoin loloos ida husi família, komunidade, empreza, instituisaun ka nasaun ida, justu duni atu selebra ezemplu di’ak liu sira kona-ba serbisu no exelénsia, hanesan fonte enkorajamentu no inspirasaun nian hodi hasoru dezafiu sira husi dezenvolvimentu.
“Ba Traballadór Timoroan no Estranjeiru hotu-hotu ne’ebé kontribui ho laran tomak ba Timor-Leste ida-ne’ebé modernu, dezenvolvidu no prósperu liután, ha’u hakarak tebes, hodi ha’u nia naran rasik no governu nia naran, hato’o ami nia agradesimentu ne’ebé boot tebes,” hakotu. (Lee Notísias Seluk Iha Jornál Timor Post/ Asesu You Tube Timor Post)
698 total views, 12 views today
Bele hare Video Seluk :