(Reportajen Jaime Pires/Editor Mateus da Cruz)
DILI (Timor Post)-Atu garantia traballadór sira hodi sustenta sira nia moris uma laran, Konsellu Sindikatu Traballadór Timor-Leste (KSTL), husu ba governu lideradu Primeiru Ministru Taur Matan Ruak, atu iha tinan ida ne’e tenke hasa’e saláriu báziku ba traballadór sira hotu.
“Agora ita ezije ba governu tempu ona atu hasa’e ona saláriu mínimu traballadór sira nia, tempu mak agora ona la’ós tinan oin tan,” dehan Prezidente KSTL, Almerio J. Vila Nova, liuhusi nia diskursu hafoin selebra loron mundiál Traballadór, iha Palásiu Governu oin, Domingu (01/05) ne’e.
Prezidente KSTL ne’e hatete, nia parte sei haruka karta ba Parlamentu Nasionál no governu hodi tau konsiderasaun ba saláriu Traballadór sira nian.
Estadu da ne’e tenke iha responsabilidade ba ninia sidadaun sira liu liu tenke haree ba problema ne’ebé oras ne’e traballadór sira enfrenta. Folin sasán agora sa’e maka’as iha merkadu mundiál inklui Timor Leste halo traballadór sira difisil tebes atu sustenta sira nia moris no uma laran, tanba sira nia saláriu atuál la sufisiente hodi sustenta moris.
“Tanba traballadór ida iha família uma laran na’in lima, sira oinsá atu hadi’a moris no sustenta sira nia família ho saláriu mínimu $115 nafatin, sira tuur iha governu no parlamentu kada fulan hetan saláriu $2000 resin de’it dehan sei araska satán Traballadór sira ho saláriu $115 ne’e,” nia dehan.
Tuir nia iha ema nia nasaun kada tinan sempre halo revizaun ba saláriu mínimu maibé maibé iha Timor-Leste nunka akontese, tinan 10 liu ona Traballadór sira kontinua moris ho saláriu mínimu $115 USD, maski sira servisu oras barak nia laran.
“Se sira la tau nafatin konsiderasaun sei akumula Traballadór sira hotu hodi kontinua halo demonstrasaun hodi kontinua ezije ba governu atu hasa’e ona saláriu mínimu iha tinan ida ne’e,” nia deklara. (Lee Notísias Seluk Iha Jornál Timor Post/ Asesu You Tube Timor Post)
1,443 total views, 3 views today
Bele hare Video Seluk :
Subscribe to Timorpost
