(Reportájen Olga Soares/Editora Suzana Cardoso)
DILI (Timor Post) – Dom Virgilío do Carmo da Silva SDB, husu ba kandidatu Prezidente Repúblika períodu 2022-2027, ne’ebé hetan fiar hosi povu, atu tau-an hanesan Xefe Estadu no kaer metin konstituisaun RDTL.
“Kuandu sai aman ba nasaun, laiha ona ha’u nia grupu A ka B. Maibé haree grupu hotu hanesan. Tanba ema hotu fó ona votu maioria atu sai aman ba rai ida ne’e. Nune’e tenke ezerse ninia kbiit nu’udar aman ida hakuak no sai sinal Unidade hodi garante no kaer metin konstituisaun RDTL.”
Hateten Arsebispu Metropolitana ba Arque Diosez Dili, Dom Virgilío do Carmo da Silva SDB ba Jornalista hafoin ezerse nia votu iha Sentru votasaun Sedu Suku Licidere, Tersa, (19/04).
Nia hateten, ba kandidatu sé de’it mak povu fó fiar atu sai Prezidente Repúblika, katak sai ona aman ba nasaun. No aman ida ne’ebé hakuak oan hothotu. La husik oan ida iha liur.
Dom Virgilío subliña, sai xefe Estadu hanesan ema hotu hatene katak Bali konstituisaun. Nune’e aman ida nia hatene hakuak ema hotu no hatene tau mós dixiplina atu oan hothotu la’o iha dalan ne’ebé loos.
“Katak ida ne’ebé sai sasukat atu bele garante rai ne’e la’o loos mak ita nia konstituisaun RDTL. Aman hadomi no aman mós tenke firme. Katak, kaer metin konstituisaun,” Dom Virgilio alerta.
Tanba hatutan Dom Virgilio, konstrusaun mak sai sasukat ba ema hothotu hodi lori rai ida ne’e iha pas, prosperidade no lori demokrásia ne’e too rohan.
Dom Virgilío afirma katak, sai Xefe Estadu, tenke hakbesik ba povu. Labele hanoin tempu kampaña dei’t mak hakbesik ba povu. Maibé liuliu iha tempu baibain. Oinsá besik ba povu hodi hatene liu povu nia aspirasaun.
Enkuantu Eleisaun Segunda rounde Dom Virgilio dehan, sai hanesan oportunidade hodi bele determina loloos kandidatu ida ba Prezidente Repúblika iha Nasuan Timor –Leste hodi bele hala’o ninia funsaun too rohan.
“Ha’u nia esperansa, ba dahuluk sidadaun hothotu bele ezerse sira nia diretu. No bele hakat ba Sentru votasaun. No esperansa boot ida mak, husu atu labele repete failansau ida ne’ebé akontese iha primeiru rounde. Tanba, iha maluk barak mak la konsege vota. Maibé hein katak sidadaun hothotu bele ho ánimu, liberdade no ksolok hakat ba hodi hili Prezidente ne’ebé atu ukun rai ne’e iha tinan lima mai,” dehan Dom Virgilio. (Lee notisia seluk iha jornal Timor Post/Asesu You Tube Timor Post)
648 total views, 3 views today
Bele hare Video Seluk :
Subscribe to Timorpost
