(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post) – Ministériu Asuntu Parlamentár Komunikasaun Sosiál (MAPKOMS) liu-husi Diresaun Nasionál Promosaun Dezenvolvimentu Média Lokál (DNPDML Sigla Portugés) fó formasaun ba Rádiu Komunidade no mídia Privadu sira durante loron rua hodi hakbiit kapasidade profisionalizmu rádiu komunidade no mídia privadu sira.
“Objetivu Prinsipál husi formasaun ida ne’e atu haforsa koñesimentu media sira nian, iha area rua, formasaun utilizasaun software no live report ba rádiu komunidade sira, ba Pot Cast no YouTube karik iha software ruma oradór sira, sei fahe iha formasaun atu fasilita media sira hodi divulga informasaun ne’ebé iha plataforma,” Diretór DNPDML, Jose Da Costa, hatete, iha hotel JL Villa, Fatuhada, Kuarta (06/04).
Nia hatutan, iha formasaun ne’e, hetan partisipasaun husi Radiu Komunidade, mídia Defisiénsia, Rádiu Akadémika, mídia privadu sira sanulu-resin-rua (12), no mídia husi SEKOMS nian na’in-lima (5), no kada media sira reprezenta ema na’in-1, formasaun ne’e ho durasaun loron rua.
“Oradór sira ne’ebé mak sei fó formasaun mai husi Konsellu Imprensa (KI), no Jornalista senior husi Rádiu Televizaun Timor-Leste, Empreza Públika (RTTL,E.P) no Jornalista senior husi Rádiu Timor Kmanek (RTK),” nia dehan.
Entretantu, Diretór Jerál Ministériu Asuntu Parlamentares Komunikasaun Sosiál (MAPKOMS), Ponciano da Cruz Leite, hatete, mundu modernu ho teknolojia, entaun ita presiza adapta, hodi avansu iha fatór hotu-hotu, inklui hahalok sira,
“Sei ita la adapta, entaun ema nia notísia tun tarde, tanba ne’e, ita presiza halo adaptasaun ho progresu dezenvolvimentu teknolojia, informasaun no komunikasaun ne’ebé relevante ho situasaun atuál, ho ida ne’e, media ida-idak sempre esforsu aan rasik, maibé MAPKOMS iha kompeténsia atu hakbiit media sira, ho modelu kapasitasaun no formasaun bele adapta teknolojia ne’ebe modernu,” nia relata.
Nia akresenta, portantu MAPKOMS, liu-husi DNPDML, kontinua involve radio komunidade sira hodi bele partisipa iha formasaun hanesan ne’e, no formasaun sira seluk, ne’ebé mak sei tuir mai, atu ajuda jornalista radio nian, hodi avansa no utiliza software para halo tranzmisaun direita. (Asesu Notísia Seluk Iha Jornál Timor Post/ Asesu You Tube Timor Post)
1,264 total views, 3 views today
Bele hare Video Seluk :