(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post)– Ministériu Solidariedade Sosiál no Inkluzaun (MSSI) liu husi Diresaun Nasionál Asisténsia Sosiál (DNAS), kria programa Bolsa da Mae Jerasaun foun hodi fó subsídiu ba inan isin rua, bebé inklui ba labarik ho defisiénsia sira, hodi bele reforsa inan sira atu sosa hahán nutritivu durante períodu infánsia.
Xefe Scor Lead apoiu MSSI, liu husi Parseira Dezenvolvimentu Umanu USAID, Carmeneza dos Santos Monteiro, hatete, Objetivu husi programa ne’e, hodi redús insidénsia husi númeru pobreza no gravidade husi pobreza, sukat husi lakuna pobreza no atu hadi’ak saúde ou nutrisaun inan no labarik, liu-liu labarik primeira infánsia sira ne’ebé menus nutrisaun ka nutrisaun krónika.
Lee Notisia Relevante : Inan Isin Rua Sei Hetan Subsídiu 15 USD Kada Fulan
Nia dehan, ba labarik hotu-hotu hosi tinan 6-0 mai kraik sira iha direitu asesu ba dolar amerikanu 20 kada fulan, bainhira labarik ida identifika ho kondisaun defisiénsia bele hetan tan adisional 10 USD, nune’e hamutuk 30 USD.
“Labarik sira hahú husi tinan zero to’o tinan tolu iha faze primeiru infánsia nia valor subsídiu aumenta ba 20 USD, ba labarik ho kondisaun normal durante faze primeiru to’o tinan tolu no kontinua ba tinan neen, maibé ba labarik balun moris ho kondisaun defisiénsia sei hetan adisional 10 USD sa’e 30 USD,” nia hatete iha Otél Timor, Tersa (29/03).
Apoiu subsídiu ba labarik ho kondisaun defisiénsia ne’e atu inan sira lori nafatin ba sentru saúde hodi bele kontrola oan sira hetan imunizasaun kompletu no subsídiu ne’e bele hola hahán nutritivu ba labarik sira durante períodu infánsia.
“Kona ba labarik ho defisiénsia, sei hetan direitu subsídiu ne’e bainhira doutór ka enfermeira sira sei haree katak, labarik ne’e nia defisiénsia, bele iha defisiénsia fízika ou defisiénsia husi moris kedas ka defisiénsia ne’ebé kontribui husi la han hahán nutritivu,” nia tenik.
“Sub-sidiu ida ne’e tanba governu rekoñese katak, labarik sira ne’ebé ho kondisaun defisiénsia persiza tan rekursu umanu atu fó kuidadu ba sira,” nia haktuir.
Programa ne’e, sei implementa iha fulan Abril ou Jullu tinan ne’e, sei hahu husi munisípiu tolu hanesan Ainaru, Bobonaru no Oekusse. Sei halo rejistu ba benefisiáriu sira husi munisipiu tolu ne’e, hafoin ne’e sei kontinua mós ba iha munisipiu sira seluk. (Asesu Notisia Seluk Iha Jornal Timor Post/Asesu You Tube Timor Post)
1,301 total views, 3 views today
Bele hare Video Seluk :
Subscribe to Timorpost
