(Reportajen Jaime Pires/Editor Mateus da Cruz)
Dili (Timor Post)- Primeiru Ministru (PM) Taur Matan Ruak, ezonera tan ona membru governu na’in-2, ida maka Sekretária Estadu Igualdade no Inkluzaun, Maria Foneseca, hosi Partidu Libertasaun Populár (PLP), no Sekretáriu Estadu Terras no Propriedades, Mário Ximenes hosi Partidu Kmanek Haburas Unidade Nasionál Timoroan (Khunto).
“Primeiru Ministru ohin bolu ha’u mai klarifika katak, tempu badak ha’u tenke husik ha’u nia pozisaun hanesan membru do Governu,” dehan Mário Ximenes, ba jornalista sira iha Farol, hafoin remata enkontru ho Primeiru Ministru Taur Matan Ruak, segunda (28/03).
Nia dehan, prontu simu desizaun saida de’it maka Primeiru Ministru deside tanba nu’udar membru governu hakarak ka lakohi tenke kumpre ba desizaun xefe governu.
“Ha’u prontu hodi simu desizaun ida ne’e, tanba durante ha’u asume kargu ha’u servisu tuir saida mak ha’u bele halo hodi kontribui ba nasaun, ida ne’e mak ha’u halo, tanba tuir ha’u nia kbi’it mak ha’u kontribui ona durante tinan tolu fulan sia,” dehan Nia.
Suseus sira ne’ebé maka nia halo ona durante mandatu maka rendimentu iha Terras no Propriedades ne’e $2.8 de’it maibé, durante nia Mandatu situasaun Covid-19, no polítika rai laran la’o’ ladún di’ak, maibé rendimentu husi $2.8 ne’e sa’e to’o $4.3, ida ne’e mak nia susesu.
“Maibé Primeiru Ministru kontinua fó korajen ba ha’u, hodi ha’u tenke simu desizaun ida ne’e, tanba ha’u mai husi partidu Khunto, agora fatin ne’e sé mak atu ba tuur fali iha ne’ebá, ha’u la hatene,” hakotu Nia.(Lee notísia seluk iha jornál Timor Post/asesu You Tube timor post)
716 total views, 3 views today
Bele hare Video Seluk :