(Reportajen Jaime Pires/Asistente Editor Hermenegildo da Costa Tilman)
Dili (Timor Post)- Amu Bispu Arquidioseze Metropolitana Dili, Don Virgilio do Carmo, SDB, hatete, to’o ohin loron informasaun kona-ba data vizitasaun Papa Francisco atu mai vizita Timor-Leste seidauk fiksu.
“Ohin reprezentante Amu Papa ninian rasik ko’alia ba ita hotu iha ne’e dehan, Amu Papa ko’alia ba nia pesoalmente hakarak duni atu mai Timor, maibé data seidauk fiksu,” dehan Arsebispu Dili bá jornalista sira, hafoin halo serimonia inaugurasaun, ba Universida Katolika Timorense (UCT), iha Balide, Kinta (24/03).
Amu Bispu, dehan, to’o agora data ida atu determina ne’e seidauk sai entaun hein hela ida ne’e, hafoin bele hatene mai iha sa fulan no sa loron, maibe los katak tinan ida ne’e duni mak Amu Papa atu mai.
Notisia Relevante : Amu Papa Konvida Fiar Na’in Sira Hamutuk Reza Ba Paz Iha Ukrania-Rusia
“Tanba Amu Papa rasik seidauk deside sa loron mak atu mai, razaun saida mak seidauk deside ita la hatene, maibé data seidauk determina,” tenik nia.
Nia reforsa, tanba ne’e mak ohin reprezentante Amu Papa Monseigneur Marco Sprizzi dehan, nia parte mós sei hein de’it bainhira mak Amu Papa deside loron atu mai vizita sarani sira iha Timor-Leste ne’e.
“Sim tinan ida ne’e duni mak Amu Papa atu mai, maibé iha sa fulan no sa loron ne’e mak seidauk determina, tanba nia rasik mak sei determina loron no fulan atu mai vizita ne’e,” hakotu.(Lee Notisia seluk iha Jornal Timor Post/Asesu You Tube Timor Post)
1,033 total views, 3 views today
Bele hare Video Seluk :