(Reportájen Jaime Pires/Editora Suzana Cardoso)
DILI (Timor Post) – Hafoin loron daruak kontajen votu eleisaun Prezidensiál tinan 2022 nian ne’ebé hala’o iha loron Sábadu, (19/03/2022), iha loron Segunda, (21/03/2022) ne’ebe kontajen votasaun atinji ona to’o 91,75%, Sekretáriu Jerál Fretilín Mari Bin Amude Alkatiri no Prezidente Partidu Libertasaun Popular atuál Primeiru Ministru, Taur Matan Ruak ba hasoru malu ho kandidatura númeru sorteiu ‘8’, Lere Annan Timur iha ninia rezidénsia, Segunda, (21/03/2022).
“Ha’u mai kumprimenta de’it, hanesan maun ho alin. No fó parabéns tanba bele kontribui ba eleisaun ida ne’ebé mak pasífiku. Buat hotu-hotu la’o ho di’ak,” esplika Prezidente Partidu Libertasaun Popular (PLP) atuál Primeiru Ministru, Taur Matan Ruak ba Jornalista sira hafoin remata hasoru malu ho Lere.
Antes ne’e tuir informasaun ne’ebé Timor Post asesu hateten, Sekretáriu Jerál Fretilín Mari Bin Amude Alkatiri moos tenta atu hasoru malu ho Lere Anan Timor antes tuku 08:00 dadeer OTL, maibé la konsege. “Marii mai hamriik de’it iha portaun. Lakleur de’it fila ona,” konta fonte ne’ebé lakohi temi naran.
Soru mutuk entre PM Taur ho Lere durante maizumenus oras laran 2 nia laran, tuir PM Taur sira ko’alia de’it asuntu ligasaun nu’udar maun ho alin ne’ebé partisipa no kontribui ona iha eleisaun pasifika hodi buat hotu-hotu la’o ho di’ak. Tanba hanesan maun ho alin ne’e mak mai kumprimenta malu.
Lia fuan hanesan Lere hato’o ba Jornalista katak, nia parte ohin simu Taur Matan Ruak hodi konversa. Tanba nia (Taur) hanesan ha’u nia alin.
“Ohin Mari Alkatiri mai iha ne’e ha’u la simu tanba ha’u sai. Maibé Taur mai ne’e ha’u simu, tanba nia mai la’ós Primeiru Ministru, maibé hanesan ha’u nia alin. Tanba ne’e mak ha’u simu ne’e,” dehan Lere.
Nia reforsa, tanba Taur hatene nia parte la pasa iha Kandidatu Prezidente Repúblika entaun hanesan maun alin mai ko’alia ida ne’e de’it.
“Ami la ko’alia tan buat seluk, fora husi ida ne’e. Tanba nia mai ha’u la pasa iha Kandidatu Prezidente Repúblika ne’e mak nia mai dezafia ha’u hanesan Alin. Mai fó solidariedade no mai vizita de’it ha’u,” tenik Lere.(Lee Notísia Seluk Iha Jornál Timor Post/Asesu You Tube Timor Post)
1,164 total views, 3 views today
Bele hare Video Seluk :