ADVERTISEMENT

CNRT La Halo Movimentu Polítiku ‘hanesan’ Partidu Seluk iha Parlamentu Nasional

Timor Post - Jeral
  • Share

DILI—Xefe Bankada Partidu CNRT, Duarte Nunes afirma, nia pare iha Parlamentu Nasionál la halo movimentasaun polítiku tuir pontu ida husi tolu ne’ebé Prezidente Repúblika Francisco Guterres Lú Olo fó sai hafoin reuniaun ka diálogu entre líder istóriku sira iha Palásiu Prezidensiál, Bairro-pité, Dili, Segunda (10/02/2020).

Timor Post seidauk hetan konfirmasaun kona-ba movimentasaun partidu FRETILIN, PLP, KHUNTO, PD, UDT/FM no PUDD, maibe Xefe Bankada CNRT dehan, sira mantein pozisaun.

ADVERTISEMENT
SCROLL FILA BA NOTISIA


“Ami iha ne’e hela de’it (parlamentu nasionál) la halo movimentu polítiku, sira (partidu) seluk buka malu, ami laiha, ami la’e, ami la buka ema ida (partidu seluk), ne’e ami nia pozisaun, Ok!,” Duarte hatete ba Timor Post iha Resintu Parlamentu Nasionál, Kuarta (12/02/2020).

Entretantu rejultadu diálogu entre líder istóriku sira ne’ebé hala’o kuaze oras hitu nia laran, konsege rejumu pontu tolu ne’ebé sai hanesan alternativu ba hakotu impase polítika iha rai laran mak hanesan, dahuluk, eleisaun antesipada hanesan rekursu ikus liu; daruak, partidu polítiku sira ne’ebé asentu parlamentar nasionál hotu-hotu tenke halo movimentu polítiku oinsá mak bele dezeña opiniaun no hakarak atu bele hetan solusaun ba impase polítiku ida ne’e; no datoluk, primeiru ministru sei mantein nafatin primeiru ministru ba governu daualu to’o hetan solusaun ba situasaun polítika atuál.

Lú Olo dehan, liuhusi dalan diálogu ida ne’e nia fi’ar katak sei iha solusaun ida ne’ebé di’ak liu ba Timor Leste nia situasaun polítika hodi labele sakrifika nafatin dezenvolvimentu nasionál.

“Liu husi hanoin di’ak husi líder sira hotu para bele ultrapasa situasaun,” Lú Olo hatete.

Lee Mós :
Taur Louva Xanana iha Luta Kontra Atake Pesti Corona

Marka prezensa iha diálogu ne’e líder istóriku no personalidade sira hamutuk na’in lima, inklui Marí Bim Amude Alkatiri, José Manuel Ramos Horta, Taur Matan Ruak, Lere Anan Timur, Roque Rodrigues.

Kayrala Xanana Gusmão maka auzensia iha diálogu ho rajaun tuir konfirmasaun ne’ebé Timor Post hala’o katak, hafoin partisipa entrevista espesial iha televizaun, Xanana aranka kedas ba Lospalos ho objetivu ba kari aifunan ba nia inan hakiak durante tempu rejisténsia, ho naran Jacinta de Jesus, iha Bauro, Lospalos, Munisípiu Lautem.

Entretantu Prezidente Partidu CNRT, Kayrala Xanana Gusmão afirma, nia partidu la hanoin atu partisipa iha governu foun alias governu dasia bainhira prezidente repúblika foti desizaun ba ida ne’e ho dalan saida de’it. No ho análiza informal atu hakotu impasse polítika atuál prefere eleisaun antesipada.

Xanana dehan, atu forma governu foun, tuir konstituisaun liga ho situasaun atual iha ne’ebé governu la’o no parlamentu nasional la’o hela no primeiru ministru la rejigna-an, maka liu loron 60 nia laran hahú husi loron proposta Orsamentu Jerál Estadu 2020 nian la liu iha parlamentu nasionál, prezidente repúblika tenke dissolve parlamentu nasionál.

“Ha’u sente atu iha governu foun primeiru ministru tenke rejigna-an lai. Se orsamentu jerál estadu laiha, ha’u hanoin liu tiha loron 60, prezidente repúblika tenke dissolve tiha parlamentu nasionál,” Xanana afirma kestaun ne’e iha programa grande entrevista iha GMNtv ne’ebé halo iha loron Sábadu (08/02/2020).

Xanana la hatete klean katak sé CNRT la hanoin partisipa iha governu foun tanba mantein nafatin ho governu AMP, maibé nia hatutan tan, atu forma governu foun ho sé de’it, maka CNRT la hanoin ho rajaun CNRT iha serteja absoluta katak prezidente repúblika la fó posse ba CNRT nia ema sira

Lee Mós :
Dia Internacional da Mulher - Três mulheres, três gerações, três exemplos inspiradores

Xanana defende dignidade partidu nian ho membru sira ne’ebé pendente ne’e afeta tebes ba dignidade CNRT nian.

Xanana hatan ba pergunta kona-ba informasaun sira katak la’ós prezidente repúblika maka lakohi fó posse maibé primeiru ministru maka lakohi haruka membru pendente sira nia naran ba prezidente repúblika, katak, nia la fi’ar ida ne’e.

Entretantu Xanana resposta ba isu sira durante la’o katak CNRT sei forma governu foun ho FRETILIN, katak, difisil tebes atu akontese tanba CNRT lakohi fó todan fali ba FRETILIN.

“Difisil ba ami CNRT. Ami lakohi kedas atu fó todan fali ba FRETILIN. Ema balun dehan ho CNRT nia beikten ne’e maka nasaun agora mai to’o iha impase polítika,” Xanana dehan.

Hatan ba pergunta kona-ba deklarasaun Primeiru Ministru Taur Matan Ruak katak, CNRT mak oho mate AMP, Xanana dehan, sé ema hotu akompaña akta ne’ebé AMP hasai molok ba debate OJE 2020 maka, nia hatene la’ós CNRT mak oho AMP maibé iha akta ne’e iha alinea ida dehan hún ba impase polítika ne’e tanba prezidente repúblika la fó posse ba membru governu pendente sira.

“Ha’u hakruk ba deputadu CNRT, tanba sira iha parlamentu nasionál nu’udar reprejentante povu, ne’ebé povu hili sira. CNRT la asal bunyi, sira hatudu sira nia maturidade polítika. Hatudu nia konesimentu iha aspetu legal no finanseiru. No hatudu kompriende sistema,” Xanana dehan.

Kona-ba sustentabilidade governasaun, maibé Xanana dehan iha diferénsia boot ho FRETILIN, tanba iha esperiénsia diferénsia sira nia foti ezemplu tratadu fronteira marítima de’it mos FRETILIN la fó apoiu.

Lee Mós :
Konfrontu Surik-Mas, PNTL Kaptura Suspeitu Nain-Lima

“Ne’e problema boot no problema prinsípiu, nune’e ho CNRT la serve hamutuk ho FRETILIN,” Xanana afirma.

Kona-ba tanba-sa CNRT la troka membru pendente sira ne’e, Xanana dehan iha konstituisaun órgaun estadu ida-idak iha nia kompeténsia. Tanba ne’e iha artigu 106 iha alineia 2 hatete momoos hela katak prezidente repúblika nomeia membru governu sira tuir proposta primeiru ministru nian.

Nu’udar Prezidente partidu ida, fó fi’ar ba prezidente repúblika ida ne’ebé halo konstituisaun, liuliu kona-ba ninia kompeténsia atu hakotu impase polítika atual.

CNRT labele sente an, no aprejenta alternativa ba solusaun ruma, tanba iha serteja absoluta tanba nia membru sira la hetan posse.

Xanana dehan, prezidente repúblika ho primeiru ministru maka mak iha responsabilidade atu rejolve problema nasaun.

“Ha’u sidadaun baibain ida, derepente reprejentante soberania estadu ida ba buka sidadaun ida hodi rejolve poblema nasaun nian,” Xanana subliña. Nia dehan, ne’e laloos no husu prezidente repúblika ho primeiru ministru maka tenke túr hamutuk hodi hodi hetan solusaun ba povu no nasaun nia moris.

Ikus liu Xanana husu ba povu tomak liuliu juventude sira atu kontinua túr hakmatek tanba problema dadauk ne’e la lori ita ba rai kuak. Xanana dehan, hotu-hotu fó fi’ar ba órgaun estadu sira atu hakotu tuir dalan konstitusional. (ato)

 820 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “CNRT La Halo Movimentu Polítiku ‘hanesan&…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No