(Reportajen Mariano Abi/Editor Mateus da Cruz)
Dili (Timor Post)— Diretór Jerál Sekretáriu Tékniku Administrasaun Eleitorál (STAE), Acilino Manuel Branco, konsidera Informasaun ne’ebé lansa pájina Facebook, Fakuldade Ekonomia, Universidade Nasionál Timor Lorosa’e (UNTL), ne’e la loos.
Diretór STAE hato’o kestaun ne’e relasiona ho informasaun ne’ebé lansa iha pájina Facebook Fakuldade Ekonomia no Jestaun UNTL katak dadus sira ne’ebé maka UNTL submete ba STAE relasaun ho estudante sira ne’ebé maka atu halo votasaun paralelu la hetan konsiderasaun, no dehan votasaun paralelu kansela.
“Informasaun ne’e la’ós husi STAE, ne’e husi parte irresponsabilidade balu, alias mai husi UNTL, fakuldade ekonomia i kestaun ne’e la’ós STAE mak fó sai, tuir loloos labele fó sai, tanba Informasaun Sira ne’ebé mak relasiona ho prosesu eleitorál, se mak iha kompeténsia atu fó sai maka órgaun eleitorál, STAE ho CNE rua ne’e de’it,” nia afirma, iha ninia kna’ar fatin, kaikoli, kinta (17/03).
Nia husu parte Sira ne’ebé mak fó sai Informasaun sira liga ho eleisaun ninian, ne’e laloos, no fonte ne’e la’ós kredibel, tanba sira la’ós instituisaun ida ne’ebé mak ho sira ninia atribuisaun, hodi bele organiza eleisaun.
Nia konsidera parte sira ne’ebé mak fó sai Informasaun laloos hanesan ne’e, sira la iha responsabilidade, no hanesan tentativu ida atu impede ema, hodi la bele ba vota.
“Ne’e kuandu ita liga ba Lei, ne’e krime, nune’e ha’u husu ho atensaun ba parte hotu-hotu, por-favor labele fó sai Informasaun sira ne’ebé mak la’ós faz parte ba ita boot sira nia area ami halo ona kontaktu ba UNTL, atu bele husu deskulpa, no hasai tiha Informasaun laloos, ne’ebé sira fó sai iha media, sei sira la husu deskulpa, ha’u sei foti medida ruma,” nia dehan.
Hato’o Deskulpa
Entretantu relasiona ho kestaun ne’e, parte Fakuldade Ekonomia no Jestaun liu hosi sira nia pájina facebook, hato’o ona deskulpa ba STAE no ba públiku tomak ba informasaun ne’ebé sira lansa.
“Media fakuldade ekonomia no jestaun hakarak hato’o deskulpa boot ba públiku relasiona ho publikasaun ne’ebé maka publika ohin dader nian ho imajen ne’e, ba atensua tomak obrigado e deskulpa,” haktuir iha pájina ne’e.(Lee notísia seluk iha jornál Timor Post/asesu YouTube Timor Post)
661 total views, 3 views today
Bele hare Video Seluk :
Subscribe to Timorpost
