(Reportajen Jaime Pires/ Editor Mateus da Cruz)
Dili (Timor Post)- Kandidatu Prezidente Repúblika períodu 2022-2027, Rogério Tiago Lobato, deklara, sei halo reforma ba Banku Nasionál Komérsiu Timor Leste (BNCTL-Sigla Portugés), atu sai banku ida ne’ebé fó apoiu ba setór Privadu sira.
“pontu revista ha’u nia mak ida ne’e, ita tenke halo reforma ita nia banku, no tenke fó apoiu ba setór privadu atu Timoroan sira labele depende de’it ba setor Públiku,” nia dehan liuhusi debate Públiku entre kandidatu Prezidente Repúblika ba períodu 2022-2027, iha Hotel Turizmu, Tersa, (15/03).
Nia hatete, BNCTL hanesan banku timor nian, estadu presiza kapitaliza banku ida ne’e. presiza hasai osan husi Fundu Petróleu hodi tau iha banku nune’e bele apoiu, Timoroan hotu ne’ebé hakarak asesu ba kréditu iha Banku.
Nia aumenta, agora iha banku estranjeiru barak iha timor, bainhira Timoroan sira husu atu kréditu ruma susar tebes, balun hetan maibé funan ida ne’ebé mak boot.
Alende ne’e, nia mós promete sei fasilita joven sira ba servisu iha rai li’ur, tanba durante ne’e reseita barak liu ne’ebé tama mai rai laran maioria hosi joven sira ne’ebé servisu iha li’ur.
“hakarak hadi’a ita nia ekonomia no diversifika ita nia ekonomia dalan ida mak oinsá mak ita bele fasilita ita nia joven sira ba servisu iha rai li’ur, tanba reseita ne’ebé mak Timoroan sira haruka husi rai li’ur mai Timor ne’e konstitui segundu reseita depois de Petróleu no gás,”nia dehan.(Lee notisia seluk iha Timor Post/Asesu You Tube Timor post)
939 total views, 3 views today
Bele hare Video Seluk :
Subscribe to Timorpost
