(Reportajen Jose Mauno/Editor Mateus da Cruz)
DILI—Komisaun Nasionál Eleisaun (CNE-sigla Portuges) hamutuk ho Sekretáriadu Tékniku Administrasaun Eleitorál (STAE) no reprezentante kandidatura 16, hafoin diskute kona-ba realizasaun eleisaun prezidensiál iha Australia, ikus mai sira hotu konkorda asina akta ida ne’e sai base no hakarak simu desizaun tribunal rekursu.
Prezidente CNE, José Antonio da Costa Belo Pereira, hatete, CNE simu ona notifikasaun husi tribunal no CNE sei resposta iha tempu badak. Kuandu tribunal pronunsia buat ruma maka hotu-hotu sei simu rezultadu katak bele hala’o ka labele hala’o, ne’e depende husi desizaun tribunal.
“Ami avansa kedas ho akta ida hotu-hotu asina entre CNE, governu reprezenta husi vice MAE, STAE, no reprezentante kandidatura 16 ne’ebé mak konkorda katak akta ida ne’e sai base no hakarak simu desizaun tribunal”, Prezidente CNE José Belo, hateten ba jornalista sira iha salaun CNE, Kolmera, tersa (08/03).
Nia dehan, bainhira realiza votasaun iha Australia mós sei konsidera de’it númeru eleitór sira ne’ebé mak vota ona iha 2018, sidadaun ne’ebé mak foin ba no idade to’o maibé seidauk iha eleitorál sei la tuir votasaun.
“Ita laiha intensaun ida, CNE hakarak votu ida importante ba rai TL maibé tenke la’o tuir regra hodi asegura prosesu ho di’ak”, nia afirma.
CNE hato’o ba tribunal atu foti desizaun h karater urjente para hala’o, maibé CNE ho STAE kontinua koordena halo preparasaun.
Sikun seluk, diretór jerál STAE, Acilino Manuel Branco, hatete agora ekipa atu arranka hodi realiza eleisaun iha Diaspora tanba hotu-hotu hatene katak atualizasaun base de dadus prosesu ida ne’ebé mak konklui tiha ona iha loron 14 Janeiru.
Nia dehan, ohin iha data ikus karik iha alterasaun ba sentru votasaun balu, tuir loloos ekipa ba diaspora iha loron 11 maibé kestaun tékniku mak sei arranka iha loron 14 Marsu.
“Kazu iha Australia hanesan ohin diskusaun plenáriu iha CNE hamutuk ho reprezentante kandidatura sira hotu-hotu konkorda hein desizaun husi tribunal,” nia hateten.
Kuandu desizaun husi tribunal rekursu katak bele halo STAE preparadu atu hala’o maibé desizaun oinsá STAE prontu halo tuir.
“Ita publika iha jornál da repúblika iha loron 17 Janeiru, eleitór ne’ebé mak atualizadu iha ultimo eleisaun 2018 hamutuk 1.467 iha Australia,” nia afirma.(Lee notísia seluk iha jornál Timor Post/asesu You Tube timor post)
724 total views, 3 views today
Bele hare Video Seluk :
Subscribe to Timorpost
