(Reportajen Jaime Pires / Editor Mateus da Cruz)
Dili (Timor Post)-Hosi Joven na’in lima ne’ebé polisia kaer, Polisia Servisu Investigasaun Kriminal Nasional (SIKN), identifika ETF maka autor prinsipal sona membru F-FDTL iha Kulu-hun.
Xefi Departamentu Relasaun Públika Komandu Jerál PNTL, Superintendente Xefi, Armando Monteiro, informa, kazu ofensas integridade fízika agravadu ne’e akontese iha loron sabádu (05/03), tuku 04:00 madrugada iha Suku Kuluhun de Baixu, Postu Administrativu Cristo-Rei Munisípiu Dili.
“Suspeitu na’in lima ne’ebé mak PNTL ho PM detein iha invetigasaun hatudu suspeitu ho insial ETF mak deskonfia hanesan autor sona vitima to’o kanek grave dadaun ne’e vitima baixa hela iha Hospital Nasional Guidu Valadares (HNGV), hodi halo tratamentu intesivu,” dehan Armando iha Konfrensia Imprensa iha Kuartel Jeral PNTL, Kaikoli (07/03).
Daudaun ne’e suspeitu ETF sei detein iha sela detensaun komandu jeral PNTL hodi kompleta oras 72, hafoin ne’e sei lori ba aprezenta iha ministeriu públiku hodi tuir julgamentu interogatoriu dahuluk iha tribunal distrital Dili.
Vitima naran kompletu Francisco Pereira de Jesus Araújo hanesan membru F-FDTL foun 2021, daudaun ne’e halo hela tratamentu iha Hospital Nasional Guidu Valadares (HNGV) tanba hetan sona iha fatin haat. (Lee notisia seluk iha jornal Timor Post/asesu you tube Timor Post)
804 total views, 6 views today
Bele hare Video Seluk :