DILI—Prezidente Repúblika (PR), Francisco Guterres Lú Olo, rona prosesu realizasaun ritual ba kandidatu prezidente repúblika períodu 2022-2027.
Prezidente Komisaun Nasionál ba Eleisaun (CNE), José Agostinho da Costa Belo, hatete audiénsia ho xefe estadu hodi hato’o pontu tolu ne’ebé importante ba kandidatura sira.
“Ha’u mai hasoru sua-exelénsia prezidente repúblika, atu hato’o prosesu ritual, molok tama ba kampaña sei halo uluk ritual,” José Belo informa hafoin remata audiénsia iha Palasiu Prezidensiál Ai-tarak Laran, Segunda (21/02).
Prosesu realizasaun ritual, tenke halo uluk molok tama ba kampaña eleisaun prezidensiál, hodi natureza la’o hamutuk kandidatura sira inklui apoiante.
Órgaun Eleitorál sei akumula lia na’in sira hosi munisípiu ida-idak atu bele halo kultura tuir munisípiu ida-idak, atu ema hothotu segura no hala’o kampaña ho di’ak too eleisaun prezidensiál.
Kalendáriu atu realiza ritual, hahú iha loron 28 fulan Fevereiru tinan 2022. Prosesu realiza ritual hodi haklaken pontu ne’ebé mak hala’o tiha ona iha munisípiu sira.
Espesiál ba munisípiu Dili, tanba sei halo asina paktu entre kandidatu sira, atu sira bele kaer liman hamutuk, nu’udar símbolu ida katak eleisaun tuir prosesu demokrátiku.
Kampaña eleisaun la’ós atu fahe malu, maibé konsolida forsa oinsá mak atu bele povu sai hosi situasaun rai-laran no lori Prezidente Repúblika ida di’ak mai Ai-tarak Laran.
Iha audiénsia ne’e mós hato’o pontu daruak kona-ba debate nian, tanba debate importante liu ba kandidatu hamutuk na’in 16 hafoin hala’o kampaña.
“Ami hato’o mós ba senor prezidente repúblika katak, debate agora ho ninia konteúdu ita hakarak fó liu tempu ba ita ninia kandidatu sira, atu aprezenta sira ninia pozisaun atu ajuda eleitór sira atu vota”, nia dehan.
Debate ba kandidatura sira sei aprezenta pergunta ho portugés no resposta mós ho portugés, atu hatudu katak kompetisaun sériu duni, hakarak lori hamorin Timor-Leste ba mundu, entaun presiza ema kualidade atu jere estadu.
Debate entre kandidatu sira tenke utiliza lian portugés tanba lingua ofisial, pelumenus hato’o pergunta ho portugés no resposta ho portugés.
Konstituisaun Repúblika Demokrátika Timor-Leste, katak kandidatura sira atu sai Prezidente Repúblika tenke ho idade 35 ba leten no iha kapasidade natoon atu jere estadu. (kyt)
1,311 total views, 3 views today
Bele hare Video Seluk :