(Reportajen Jaime Pires/Editor Mateus da Cruz)
Dili (Timor Post)- Kandidatu Prezidente Repúblika, Rogério Tiago Lobato, hatete, sidadaun Timoroan iha Inglaterra no Irlandia Norte barak mak laiha Kartaun Eleitorál.
Rogério hatete, joven sira iha Inglaterra no Irlandia Norte, agora hamutuk besik ona rihun haat-nulu. Segundu reseita ba estadu depois Petróliu no Minerais mai husi joven sira ne’e, maibé barak maka seidauk iha kartaun eleitorál.
“Sira barak mak to’o agora seidauk iha Kartaun Eleitorál, luta boot ha’u iha ne’ebá ha’u haree rasik ho matan, kuandu STAE ba ona Irlandia no Inglaterra hotu-hotu hadau malu hakarak iha Kartaun Eleitorál,” nia informa hafoin partisipa semináriu iha Salaun Lalini-Larigutu CNE, Kolmera Tersa (15/02).
“Tinan haat ha’u moris hamutuk ho ita nia joven sira rihun ba rihun iha ne’ebá, sira sente abandonadu husi ita nia estadu, tuir loloos ita labele trata sira hanesan ne’e,” lamenta.
Tanba tuir nia, maski timoroan sira ne’e iha rai dok maibé sira hakarak sente hanesan Timoroan hodi hakarak partisipa iha prosesu hotu-hotu hodi lori rai ida ne’e la’o ba oin, liu-liu sira hakarak partisipa iha eleisaun prezidensiál no parlamentár ne’e.
“Ho ida ne’e ha’u husu ba CNE oinsá koordena ho STAE atu halo prosesu sira ne’e tanba agora tempu badak liu ona, molok ha’u mai STAE ba tiha ona maibé sira iha ne’ebá tempu la naruk, tanba ita tenke komprende joven Timoroan sira nia vida iha Inglaterra no Irlandia Norte,” Nia hakotu.(Lee notisia seluk iha jornal Timor Post/asesu youtube Timor Post)
2,180 total views, 3 views today
Bele hare Video Seluk :