(Reportajen Jaime Pires/Editora Suzana Cardoso)
DILI (Timor Post) – Membru Unidade Polisia Marítima (UPM) na’in neen hetan detein ona hosi Polisia Nasionál Timor-Leste (PNTL), hafoin deteta baku mate vítima Julio Amaral (22) iha Kapitál Kovalima, Suai.
Ba jornalista Portavós Komandu Jerál PNTL Superintendente Xefe, Armando Monteiro iha Komandu Jerál, Kaikoli, Segunda (24/01/2022) esplika, Komandu PNTL Munisípiu Kovalima detein ona membru UPM na’in neen ne’e iha sela detensaun.
“Membru UPM na’in neen ne’ebé deskonfia baku mate Julio Amaral ne’e, daudaun iha hela sela detensaun Komandu PNTL Munisípiu Kovalima durante oras 72, depois maka sei submete ba Ministériu Públiku”, tenik Armando.
Hanesan públika tiha ona katak, akontesimentu baku mate Julio Amaral ne’e akontese iha Munisípiu Kovalima, loron Domingu (23/01/2022), maizu menus tuku haat madrugada.
Tuir alin hosi Matebian Julio Amaral konta, sira hetan baku hafoin husu sigarru ba sidadaun ida ne’ebé sira hasoru iha dalan. Maibé sidadaun ne’e simu dehan, “Se hau lakohi fó imi hakarak saida. Hau ne’e Polisia Maritima,” hasara alin Matebian Julio Amaral, Marcos ba Jornalista iha Ospital referral Suai, Domingu, (23/01/2022) bainhira hala’o hela tratamentu.
Rona tiha dehan nia polisia, katak Marcos sira taka liman hodi husu deskulpa ba membru UPM ne’e. Maibé, derrepente de’it sira nia kolega mai tan. Nain 2 baku Marcos no na’in haat baku Matebian Julio.
“Sira baku ha’u ho ha’u nia Maun Julio. Sira baku ami to’o tama baleta koak moos sira baku nafatin. Bainhira ha’u hakfodak, ha’u nia Maun sira baku to’o mate ona. No ha’u nia primu ida seluk sira baku to’o kanek,” dehan Marcos ho lian triste.
Maibé tuir Superintendente Xefe, Armando deklara, kazu ne’e akontese tanba hotu-hotu partisipa iha serimónia inagurasaun ba uma lisan ida iha Suai, Kovalima to’o ikus mai rezulta Vítima Julio Amaral ho idade 22 lakon vida. No na’in rua seluk kanek.
Nune’e, katak eis Komandante PNTL Munisípiu Baukau ne’e, Komandu PNTL Munisípiu Kovalima kontinua halo investigasaun hodi identifika autór loloos ba kazu ne’e. No nia finalidade sei haruka mai iha komandu jerál ne’ebé agora daudaun Komandu jerál sei monitor hela.
Iha parte seluk Deputadu hosi Bankada Partidu Liberta Povu (PLP), Abel Pires hateten, tanba agresaun fízika husi Membru PNTL hosi UPM, vítima lakon vida no husik hela nia oan na’in tolu ho nia ferik oan agora sira sai faluk ne’ebé presiza tau atensaun.
“Komandu PNTL sira tenke tau atensaun ba membru sira para dixiplina. Tanba kada semana sempre rona violénsia. Membru hirak ne’ebé la kontrola sira nia emosaun husu Komandu PNTL para muda tiha sira husi fatin sira nia fatin. Nune’e labele halo violasaun hasoru tan ita nia povu”, tenik Deputadu Suai oan ne’e. (Lee notísia seluk iha jornál Timor Post/Asesu You Tube Timor Post)
1,985 total views, 12 views today
Bele hare Video Seluk :
Subscribe to Timorpost
