Jornalista Jaime Pires / Editór Noémio Falcão
Dili (Timor Post)—Governu lideradu Primeiru Ministru Taur Matan Ruak sei konsidera deklarasaun Xefe Estadu Maior Jeneral F-FDTL, Tenente Jeneral Lere Anan Timur kona-ba rejignasaun hanesan komunikasaun baibain.
Ministru Prezidensiál Konsellu Ministru (MPCM sigla Portugués), Fidelis Manuel Leite Magalhães subliña, bainhira Lere hii duni dalan ne’e tuir lei sei hatoo uluk karta ba Ministru Defeza.
“Informasaun legal kona-ba ida ne’e agora iha hanesan komunikasaun ka kontestu baibain de’it, karik tebes Tenente Jeneral Lere sei fó informasaun ba Ministru Defeza, depois Ministru Defeza sei hato’o ba Primeiru Ministru, sei mai tan iha Konsellu Ministru mak sei komunika ba Prezidete Repúblika hanesan Komadante Supremu,” Fidelis haktuir ba Jornalista sira hafoin reuniaun ho Prezidente Parlamentu Nasionál, Aniceto Guterres, iha Parlamentu Nasionál, Kinta (13/01/2022).
Fidelis dehan, nia labele adianta prosesu saida mak governu hala’o no desizaun sira kona-ba Xefe Estadu Maior Jeneral foun F-FDTL.
“Agora kona-ba desizaun saida ha’u labele adianta ba ita boot sira tanba ne’e asuntu ida ne’ebé mak presiza ministru defeza, primeiru ministru, konsellu ministru deskute klean hafoin haruka ba Prezidete Repúblika,” nia hatutan.
Antes ne’e Tenente Jeneral Lere Anan Timur ba Jornalista sira subliña, sei rejigna-an hodi hala’o fali vida sivíl.
“Naran ida atu troka ne’e ha’u seidauk adianta lai, mais automatikamente ha’u nia vise (Maijor Jeneral Falur Rate Laek), labele ema seluk, se vise la avansa entaun vise mós sai, vise ba fali vida sivíl,” Lere afirma iha komponente Navál Hera, Kuarta (12/01/2022).
Entretantu tuir informasaun ne’ebé espalla, Lere sei rejigna husi nia kargu atuál no kandidata-an ba prezidente repúblika.
685 total views, 3 views today
Bele hare Video Seluk :