Jornalista Jaime Pires / Editór Noémio Falcão
Dili (Timor Post)—Ministru Prezidénsia Konsellu Ministru (MPCM sigla Portugués), Fidelis Leite Magalhães rejeita Primeiru Ministru Taur Matan Ruak halala’o vizita namanas ba munisípiu sira ne’e hodi buka votus.
Fidelis dehan, semana hirak ikus ne’e to’o agora Taur hala’o vizita ba munisípiu sira hodi halo diálogu ho autridade lokal no komunidade sira tanba primeiru ministru iha direitu no dever konstitusional.
“Buat ne’ebé mak klaru PM halo ne’e (vizita) hanesan xefe ba governu ne’e importante tebes ba nia atu ba munisípiu sira hasoru direita ho nia komunidade sira no autoridade lokál sira hodi rona rasik sira nia preokupasaun sira, no dezafiu inklui problema sira ne’ebé mak hasoru loron-loron,” Fidelis subliña ba Jornalista sira iha Palasiu Governu, Dili, Kuarta (12/01/2022), relasiona ho preokupasaun husi deputadu opozisaun CNRT katak Taur ikus ne’e ba hala’o vizita namanas ba munisípiu hodi buka votus.
Deputadu Bankada CNRT, Domingos Carvalho de Araújo hatete, besik eleisaun ona mak Primeiru Ministru, Taur Matan Ruak foin halo vizita ba munisípiu.
“Durante ne’e sira hakmatek de’it iha fatin, la tuun ba haree preokupasaun povu nian, besik eleisaun mak tun ba halo saida? Atu bá buka votus ka ba halo saida,” Deputadu Domingos levanta kestaun ne’e iha Plenária Parlamentu Nasionál, Tersa (11/01/2022).
Iha oportunidade reprejentante povu ne’e mos kestiona Prezidente Repúblika Francisco Guterres Lu Olo ne’ebé ikus-ikus ne’e mós halo vizita tama sai munisípiu sira hodi buka votus.
Maske nune’e, Fidelis hatete, deputadu opozisaun halo duni nia kna’ar hanesan opozisaun sempre halo krítika, maibé la signifika katak buat ne’ebé mak sira ko’alia dehan Primeiru Ministru ba buka votus ne’e loos.
Nia subliña, sira ko’alia tanba ida direitu no iha dever konstitusionál, ne’ebé hanesan opozisaun dala ruma buat loos mós sira dehan sala hotu.
Atu nune’e PM hanesan kaer volante governasaun ne’e bele orientá Ministeriu sira hodi hola medida sira hodi responde ba populasaun sira ninia preokupasaun sira ne’e.
“Maibé husik ba ita nia komunidade no populasaun sira mak haree rasik no julga rasik de’it ba,” Fidelis hatete.
558 total views, 3 views today
Bele hare Video Seluk :