Jornalista Jaime Pires / Editór Noémio Falcão
Dili (Timor Post)—Ró Berlin Ramelau fábrika iha Xina husi empreza Olanda naran Damen Shipyards ho nia luan metru 16, kaladu metru 3,3, naruk metru 67,3 konvés ho aas metru 4,8 ho velosidade másima 10 too 12.
Hafoin fábrika, Ró Berlin Ramelau sai husi Xina iha loron 25/11/2021 to’o Portu Dili loron 10/12/2021.
Ró ne’e konstroi ho apoiu osan husi Governu Repúblika Federal Alemaña hamutuk Milaun Euro 7,8 no Governu Timor Leste tau milaun Euro 14.4. Maibé pagamentu husi governu Timor Leste sei hala’o bainhira parte kompañia ho governu halo ona inspesaun ikus.
Ró Berlin Ramelau sei halo operasaun ba mai Dili-Oekusi-Ataúro.
Maske nune’e, hafoin to’o iha Portu Dili, ró ne’e seidauk bele halo operasaun tanba sei halo inspesaun konjunta no lansamentu.
Tuir planu Autoridade Portuáriu Timor Leste (APORTIL), inspesaun sei hala’o iha segunda (13/12/2021) bainhira buat hotu loos ona sei hahú halo operasaun durante ferias Natal no Tinan Foun.
Kona-ba presu selu ró, Prezidente APORTIL, Flâvio Cardoso Neves hatete, nia parte seidauk bele pronunsia tanba kompeténsia iha konsellu ministru.
Flâvio haktuir, timoroan sira ne’ebé sei servisu iha ró ne’e inklui kapitaun tuir hela formasaun, maibé bainhira servisu ona mós iha parte tékniku ruma presiza nafatin estranjeiru.
“Iha área espesial balun ita presiza nafatin estranjeiru atu servisu ba ida ne’e hodi kontinua akompaña nafatin Timoroan sira ne’ebé mak sai servisu iha Ró ida ne’e,” Flâvio subliña.
Nia hatutan, formasaun ba timoroan sira liuliu kona-ba familiarizasaun ho ró Berlin Ramelau.
1,044 total views, 3 views today
Bele hare Video Seluk :