Jornalista Estajiáriu Mariano Do Santos / Noémio Falcão
Dili (Timor Post)—Komisaun Reguladora Arte Marsiál (KRAM) submete ona dokumentus husi organizasaun arte marsiál, Ikatan Kera Sakti-Timor Leste (IKS-TL) no Kmanek Oan Rai Klaran (KORK) ba ministériu justisa liu husi diresaun jeral servisu rejistu notariadu hodi hetan legalidade.
KRAM hanesan instituisaun ida ne’ebé tutela iha Sekretaria Estadu Juventude no Desportu (SEJD).
Prezidente KRAM, Octavio da Conceição hatete, nia parte entrega ona dokumentu no husu ba organizasaun arte-marsiál sira husi primeira diretiva 2020 nian ba krietrius rejistu organizasaun.
“Nunee ami lori organizasaun rua IKS-TL ho KORK, mai entrega dokumentu iha ministériu justisa liu husi diresaun jeral servisu notariadu atu bele hetan legalidade tuir dekretu lei númeru 5/2008 nian,” Octavio ba Jornalista sira Iha edifisiu Rejistu Notariadu, Sexta (26/11/2021).
Maske la temi kona-ba organizasaun arte-marsiál seluk, maibé Octavio relata, SEJD no mos KRAM servisu hamutuk ho organizasaun-tolu hanesan IKS, PSHT no KORK lori tinan ida tomak para atu priense krietrius ida ne’e.
“Hakarak atu hatete ba publiku katak lideransa husi organizasaun tolu ne’e halo esforsu i sira kumpri ona krietrius hamutuk 18 i agora dadauk dokumentu ne’e to’o ona finalidade,” nia subliña.
Iha fatin hanesan Diretur Nasionál Diresaun Rejistu Notariadu, João Fernando Martins hatete, dekretu lei númeru 5/2005 kona-ba pesoa koletiva la ho lukru ezize obrigatoriamente atividade hotu-hotu tenke rejista hodi hetan personalidade jurídiku.
“Hanesan organizasaun kuandu la rejistu iha iha ministériu justisa diresaun jeral rejistu notariadu signifika katak nia laiha personalidade juridika para atu halo atividade iha teritóriu nasionál,” João subliña.
“Ami sei verifika, ami simu ona ohin aktu de entermu entrega ona ami fo ba malu haree se buat ruma seidauk kompletu, husu ba parte sira atu halo kompleta antes ita prosesa,” nia hatutan.
Prosesu notaria sei halo eskritura publika para ba halo publikasaun iha Jornal da Republika durante loron 15 molok fó sertifikadu.
Entretantu Prezidente IKS-TL Silvestre Sufa hatete, durante ne’e IKS kuaze tinan 8 seidauk bele loke tanba hetan suspensaun atu taka iha 2013 bazeia ba rezolusaun 16/2013 depois hotu mos hatodan tan hoo lei númeru 5/2017 mais durante tinan halo prosesu rejistu nia laran rekezistus kuaze 18 priense tiha ona.
799 total views, 3 views today
Bele hare Video Seluk :