Jornalista Jaime Pires / Editór Noémio Falcão
Dili (Timor Post)—Komadante Unidade Patrolliamentu Fronteira (UPF), Superentendente Polísia Euclides Belo deside promove deviza membru hamutuk na’in-21 ba ajente prinsipál, maibe iha serimonia partisipante na’in-15 no restu komandante kompania maka halo promosaun.
“Ita promove ita nia membru UPF hamutuk na’in-15 husi postu atual ajente ba Ajente Prinsipál,” Euclides Belo haktuir ba Timor Post via telefone, Segunda (22/11/2021).
Nia subliña, ajente promovidos sira ne’e tama iha formasaun iha tinan 2015 no merese ona hetan deviza Ajente Prinsipál.
“Promosaun postu Ajentes Prinsipál ba membru sira ne’e tanba modalidade antigidade tuir lei promosaun nian, embora ida ne’e promove sira tanba hatudu ona dixiplina, loyalidade iha knaar UPF tuir lei organika PNTL nian”, tenik Nia.
Nia reforsa, esperansa Komandu mak deposita komfiansa ba Promosaun sira atu hasa’e responsabilidade tuir patentes divisa ne’ebé sira simu ohin loron.
“Ne’e katak promosaun la’ós premiu maibé responsabilidade ba sidadaun sira nia seguridade iha fronteira”, Nia hateten.
Lista membru sira halo promosaun sira mak hanesan, Honorio Duarte husi postu Quartel Batugade, Julião Soares, husi postu Nunura, Valdamiro Agus Quintão, husi Quartel UPF, Agostinho S. Araujo husi postu Nunura, Vicente das Neves husi Quartel Batugade, Octaviano Tavares, Quartel Batugade, Domingos Barreto, postu Badut Mean, Bendito Soares, postu Mota-Ain, Carminda de Jesus, postu Aeroportu Dili, Cristiano Falo, postu Tunubibi no Dircia da Conceição, husi postu Tunubibi, mak ohin hasa’e ona sira nia deviza.
Enkuantu hela na’in sanulu mak ohin seidauk hasa’e sira nia deviza, no hasa’e iha tempu tuir mai mak, na’in neen husi Postu Suai Kovalima no na’in haat husi Oe-Kusi.
Serimonia ba promosaun diviza ne’e hala’o iha Kuartel Unidade Patroliamentu Fronteira (UPF), Fatuk Boot, Postu Administrativu Balibó Munisípiu Bobonaru, segunda (22/11) dadeer ne’e.
1,161 total views, 3 views today
Bele hare Video Seluk :