Jornalista Caetano Guterres / Editór Noémio Falcão
BAUKAU (Timor Post)—Administrador Dioseze Baukau, Padre Alípio Gusmão subliña, kandidatu sira sei aprejenta husi Bispu Dioseze Maliana no Dili ba reprejentante Santa Sé iha Timor Leste.
Padre Alípio dehan, kandidatu bele na’in-lima depois sei iha prosesu selesaun ka bolu escrutínio.
“Bai-bain bispu sira mak aprezenta kandidatu, bele akontese kandidatu na’in-lima depois iha escrutínio, na’in-tolu no husi na’in-tolu ne’e hili ida,” Padre Alípio ba Timor Post iha Baukau, Sábadu (13/11/2021), hafoin diriji missa aifunan moruk Saudozu Bispu Don Basilio do Nascimento iha Igreja Katedral-Baukau.
Nia hatutan, prosesu ne’e la’o sei konsulta ho entidade sira hotu, liu-liu ho Nai Lulik sira, relijiozu/a, leigu ho líder nasionál sira.
“Depois Santa Sé mak foti konkluzaun kona-ba see mak soin liu atu kaer kna’ar ida ne’e,” Padre Alípio subliña.
Nia rasik la hatene prosesu ne’e bainhira maka la’o tanba segredu.
“Iha ona kandidatu ka ne’e bispu sira mak iha kompeténsia atu aprezenta kandidatu no bai-bain bispu sira aprezenta, nein padre ruma ka sarani sira, la hatene, to’o ikus fo sai ona dehan Baukau iha ona Amu Bispu foun mak ita foin hatene,” Padre Alípio salienta.
Entretantu Padre Alípio hatete, servisu administrador diosezanu ne’ebé nia asume nu’udar responsabilidade todan ida ne’ebé hili husi koléjiu konsultores bainhira bispu laiha.
“Buat ida bolu dehan Sedevacante ne’e kuandu bispu laiha, iha posibilidade rua, ida mak hili administrador diosezanu, hili husi órgaun ida bolu koléjiu konsultores mak hili, ida seluk Santa Sé mak hili bolu administrador apostóliku,” Padre Alípio haktuir.
Saudozu Don Basilio do Nascimento hakotu iis iha loron 30 Oktober 2021, iha Hospital Nacional Guido Valadares (HNGV), Dili, tanba atakasaun derepente bainhira partisipa selebrasaun missa ordenasaun iha Suai-Kovalima.
1,057 total views, 3 views today
Bele hare Video Seluk :