(Jornalista Jaime Pires/Editor Suzana Cardoso)
DILI (Timor Post) – Atu responde eleisaun prezidensiál ne’ebé sei realiza iha tinan oin hodi la’o ho seguru no efetivu, maka iha Orsamentu Jerál Estadu (OJE) tinan 2022 nian, Polisia Nasionál Timor-Leste (PNTL) sei sosa tan karreta hamutuk 22.
“Eleisaun Prezidensiál sei akontese iha tinan oin. Atu responde eleisaun prezidensiál ne’e, PNTL presiza tan karreta hodi asegura atividade eleisaun ne’e. Tanba, daudaun ne’e PNTL iha eskuadra barak mak nia viatura laiha. No barak mak at hotu ona.”
Lia fuan hirak ne’e esplika hosi Komandante Administrasaun PNTL, Superintendente Xefe José Soares ba Jornalista sira hafoin remata audiénsia públika ho Komisaun ‘B’ iha Parlamentu Nasionál, Sesta (05/11).
Tanba viatura barak mak at esplika Superintendente Xefe José, servisu operasaun nian daudaun ne’e sei uza karreta ne’ebé mak sosa iha tinan 2012 liubá, inklui mós motor sira ne’ebé PNTL uza ba servisu durante oras 24 nia laran to’o agora barak mak avaria ona.
Nune’e katak Superintendente Xefe José, aleinde sosa foun hodi oferese ba eskuadra sira ne’ebé mak seidauk iha viatura, sei tau mós osan hodi halo manutensaun ba karreta sira ne’ebé mak daudaun ne’e avaria hela.
Maske tuir Superintendente Xefe José, iha tinan 2019 sosa ona karreta 15 no tinan 2020 sosa tan ona karreta 25, maibé seidauk kompleta eskuadra PNTL 65 iha territóriu. Maka, tinan 2022 planu sosa tan karreta 22 hodi responde ba nesesidade operasaun iha terrenu.
Enkuantu OJE tinan 2022, PNTL propoin U$28 millaun. No aumenta adisional ho montante millaun lima hodi prepara ba eleisaun Prezidensiál ne’ebé mak sai akontese iha tinan 2022.(Lee notísia seluk iha Jornál Timor Post/Asesu You tube Timor Post)
974 total views, 3 views today
Bele hare Video Seluk :
Subscribe to Timorpost
