DILI (Timor Post)—Governu liuhusi Ministeriu Agrikultura i Peskas (MAP)-Diretór Nasionál Agrikultura i Ortikultura, Lúcio Romeo Ribeiro, informa produsaun hare iha tinan ida ne’e sa’e kompara ho tinan kotuk, tanba tinan ne’e hetan tonelada rihun 135, enkuantu tinan kotuk iha de’it tonelada rihun 120.
“Tinan kotuk, produsaun hare kulit 120 mil tonelada, konverte ba foos hamutuk 59 mil tonelada, tinan ida ne’e produsaun hare kulit iha 135 mil tonelada, dulas sai fali foos sai 72 tonelada, ne’ebé kompara tinan kotuk ho tinan ne’e iha deferénsia, maski dezastre naturais kalamidade ne’ebé akontese maibé ministériu esforsu ho entidade tomak inklui mós natar nain sira hodikonsege hasae hosi tarjetu kultivasaun ne’ebé iha, area kuda hare 28 mil ektare maibé tinan ida ne’e konsege hasae ba 30 mil ektare,” Lúcio Romeo ba Timor Post, Kuarta (20/10).
Nia afirma, iha kalamidade inundasaun ne’ebé akontese iha 04 Abríl liu ba, iha Manatutu hetan estragus produsaun hare por volta 1160 ektare, depois iha Kailaku- Maliana hamutuk 250 ektare, munisípiu sira seluk kuaze hotu hotu iha produsaun aas.
No foin daudauk ne’e, MAP halo distribuisaun ekipamentu ba agrikultór sira, ekipamentu sira agora ne’e kompletu maibé tratór mak presiza hadia ne’ebé ho investimentu osan ne’ebé bo’ot hodi halo manutensaun.
Portantu, koalia kona ba agrikola, nia dehan, tenke iha pakote ba ekipamentu sira tenke kompletu aleinde ida ne’e presiza mós gazoel, depois ba natar nain no tos nain mós tenke iha konsiénsia katak hakarak duni iha area agrikultura.
No liu hosi apoiu ekipamentu ne’e, atu normaliza temporariu ba bee, nune’e komunidade bele asesu nafatin bee hodi hetan nafatin rezultadu diak ba kultivasaun hare, ne’ebé konsege lori ministru balu ba iha terenu no mós eis Prezidente José Manuel Ramos Horta, World Food Programme (WFP), Embaixada Indonézia no Embaixada Brazil ne’ebé konsege kolleita.
Entretantu, Ministériu Agrikultura no Peska mós halo investimentu iha irrigasaun ualu iha munisípiu ualu, ne’ebé governu investe orsamentu bo’ot iha irrigasaun modernu atu bele hasae produsaun agrikultura liu-liu hare.
Tuir nia, kuaze munisípiu hotu hotu produs hare, so ke munisipiu sira hanesan Aileu, Ainaru no Ermera nia area potensialidade naton no area potensialidade ne’ebé boot liu mak Maliana, Baukau, Manatutu, Kovalima ho Manufahi.
No agora daudauk, nia dehan, seidauk bele hadia maibé normaliza de’it, tanba hanesan Manatutu nian ne’e hetan estragus bo’ot, presija investimentu osan bo’ot, parte Diresaun Nasional Irrigasaun Jestaun Utilizasaun Agua sei halo estudu ida kona ba oinsá atu hadi’a fila fali, maski agora kompañia balu halo ona maibé ne’e la tama ba iha planu tinan oin maibé ne’e konforme informasaun hosi Diresaun Nasionál ba Irrigasaun no Utilizasaun Água.(PJ5, PJ17, PJ19)
1,453 total views, 3 views today
Bele hare Video Seluk :
Subscribe to Timorpost
