DILI (Timor Post)—Profesór sira iha kapitál Dili, ezije ba Ministériu Saúde (MS) atu hala’o sensibilizasaun informasaun ba estudante ho inan-aman sira, hafoin implementa vasina Pfizer ba labarik ho idade 12 to’o 17.
Tuir Diretora Ensinu Báziku Marcelo 02 Comoro, Leocadia de Jesus, hatete Ministériu Saúde ho ministériu edukasaun tenke halo sensibilizasaun informasaun ba inan-aman sira, nune’e sira bele fó nia oan ba vasina, tanba labarik ne’ebé mai eskola iha Dili porsentu boot hosi munisípiu.
“Vasina ba labarik sira sei implementa iha eskola, maibé ita tenke iha esperansa atu labarik ida bainhira nia simu ona vasina kuandu fila ona ba uma labele akontese buat ruma, liafuan akontese ne’e ita labele rona. Tanba ne’e atu evita problema hirak ne’e presiza MS, tun ba iha baze ka komunidade nia uma hodi check labarik ninia imunidade hafoin ita fó vasina ba sira,” Leocadia hato’o preokupasaun hirak ne’e liuhosi nia intervensaun reuniaun advokasia ba implementasaun vasina Pfizer iha salaun INFORDEPE Balidi, Kuarta (13/10).
Leocadia preokupa, labarik sira kuandu simu vasina iha eskola kuandu sira hetan problema ruma, inan-aman sei kondena profesór sira. Tanba inan-aman sira-nia hanoin profesór mak obriga labarik ba simu vasina.
“Ami iha baze bainhira akontese buat ruma, ami sei simu liafuan oioin hosi estudante nia inan-aman, sira mak ameasa hodi dehan imi obriga ami-nia oan ami inan-aman sei hasai. Tanba ne’e molok implementa vasina halo favor MS servisu hamutuk ho inan-aman,” nia rekomenda.
Nune’e mós, Diretór Eskola Tékniku Vokasionál Bekora Adérito da Costa, sente preokupa bainhira laiha sensibilizasaun informasaun ba estudante sira, sei fó prejudika ba atividade aprendizajen. Tanba estudante ne’ebé eskola iha Dili, la’ós Dili oan maibé maioria mai hosi munisípiu.
“Eskola tékniku vokasionál Bekora ne’ebá, maioria estudante mai hosi munisípiu. Tanba ne’e mak ha’u sujere sosializasaun ne’ebé MS nian tenke ba too iha munisípiu para nune’e labele perturba fali ami nia estudante bainhira ba simu vasina. Tanba tenke hetan autorizasaun hosi inan-aman no inan-aman tenke akompaña,” nia sujere.
Nia informa, total estudante iha ETV Bekora 139, hosi númeru ne’e atus hitu resin mai hosi munisípiu. Tanba ne’e mak profesór ninia preokupasaun ba iha MS ninia sensibilizasaun informasaun tenke too iha baze.
Hatán ba preokupasaun hirak ne’e, Diretora Jerál Prestasaun Saúde iha MS, Odete da Silva Viegas, hatete hanesan jerente ba iha eskola labele duvida uluk. Bainhira duvida signifika fó imajen ne’ebé ba inan-aman no estudante sira atu fiar ba profesór sira-nia serbisu.
“Importante ita hanoin katak saúde ne’e buat ida ne’ebé ita labele diskute, saúde iha ema ida-idak nia liman. Tanba ne’e papél saúde nian oinsá atu prevene moras ne’e nune’e labele invade iha ita-nia rai, no labele fó risku boot ba ita-nia família no ba ita-nia nasaun,” Odete responde hodi hatán ba deklarasaun profesór sira nian.
Odete subliña, vasina sei la fó risku ba ema nia vida, nia iha risku maibé ki’ik, ne’ebé husu ba ema hotu atu hanoin uluk pozitivu no labele hanoin negativu mak uluk. (res)
1,317 total views, 3 views today
Bele hare Video Seluk :
Subscribe to Timorpost
