DILI (Timor Post)—Traballadór iha konstrusaun Portu Tibar fó solidariedade ba malu hala’o asaun kontra desizaun kompañia China Harbour Engineering Company (CHEC) tanba hapara sira nia maluk na’in-15 ho rajaun la klaru.
Sasin ne’ebé akompaña direta asaun ne’e, Agripino Marcal haktuir, traballador sira iha Portu Tibar hotu-hotu tún ba halo asaun tanba sente katak desizaun hanesan husi kompañia CHEC ba sira nia maluk 15 sei akontese mos ba sira iha futuru.
“Loron hirak ne’e sira koko konfirma ho kompañia maibé kompañia la kopera ho di’ak maka ohin, traballadór sira halo asaun,” Agripino haktuir ba Timor Post via telefone, Kuarta (13/10/2021).
Agripino haktuir, traballadór sira konsiente katak kompañia iha direitu atu termina sira nia kontratu maibé tenke bazeia ba lei trabaladór.
“Traballadór sira ne’e servisu hahú husi tinan 2019 to’o agora,” Agripino dehan.
Pontu hirak ne’ebé traballadór sira hatoo no ezije nia solusaun maka, husu kompañia selu sira nia indiminizasaun tuir artigu 55 lei traballadór; direitu sertifikasaun; husu kompañia responsabiliza ba medida koa saláriu ba impostu tanba tuir lei impostu, traballadór ida selu impostu bainhira nia saláriu $500 ba leten; direitu ba bônus annuál, lisensa annuál, over time no direitu seluk ne’ebé traballadór sira ezije kompañia tenke toma responsabiliza.
Relasiona ho asaun ne’e parte Sekretáriu Estadu Formasaun Profesional no Empregu (SEFOPE) ho Sindikatu Traballadór Timor Leste tún direta ba fasilita ona mediasaun entre traballadór ho kompañia CHEC.
To’o notísia ne’e públika Timor Post seidauk konfirma ho parte kompañia CHEC no autoridade kompetente sira inklui SEFOPE. (cao)
1,396 total views, 3 views today
Bele hare Video Seluk :