Estajiáriu (Mj10) / Editór Noémio Falcão
DILI (Timor Post)—Organizasaun Naun Governamental (ONG) Luta Hamutuk sente moe ho governu sempre tane liman ba apoiu internasional sira bainhira mosu dezastre naturál iha rai laran. Tanba ne’e, husu atu ejekutivu prepara orsamentu hodi responde ba ameasa La Nina.
Diretór Luta Hamutuk (LH), José Alves da Silva hatete, nasaun hasoru situasaun difisil hanesan akontese dezastre naturál iha dia 4 Abril liu ba, to’o agora seidauk rejolve hotu tanba governu laiha orsamentu.
“Prepara sedu ita nia orsamentu rasik, hodi nune’e ita hasoru situasaun difisil ruma, ita bele utiliza ita nia orsamentu atu responde situasaun sira lalais, labele hanesan daudauk ne’e fulan lima atu ba fulan neen ita nia maluk sira sei nafatin iha lona okos,” José subliña ba Timor Post iha ninia kna’ar fatin Faról, Dili, Kuarta (22/09/2021), relasiona ho Sekretária Estadu Protesaun Sivíl (SEPS) servisu hamutuk ho Nasoins Unidas liuhosi Global ENSO Analysis Cell no Institutu Metrolojia Jeofízika, identifika Timor – Leste hanesan nasaun ida ne’ebé sei hetan impaktu boot hosi fenómenu ameasa La Nina.
Hahú periodu iha setembru 2020 to’o marsu 2021, Timor – Leste sai hanesan alvu ba udan boot liu média normal no mós rai halai iha territóriu laran tomak.
Tanba ne’e, José hatete, governu tenke konsiente katak dezastre naturál ema hotu la espera.
Uluk liu, José dehan, governu tenke prepara kondisaun di’ak ba sidadaun sira atu nune’e sira bele hadook-an bainhira mosu duni inundasaun ka anin boot.
“Ita moe, ba ha’u nee lae nu’udar estadu ida tenke prepara atu nune’e bainhira iha La Nina ruma ka bee sa’e, anin boot, rai halai kona sidadaun sira, ita mak responde hafoin ita husu ajuda husi rai li’ur, sorte di’ak rai li’ur hakarak ajuda sei laiha ita la hatene halo nusa, atu ba tanis hamutuk ho sira de’it, ha’u la fiar ida,” José hatutan.
Ukun nain sira nia uma di’ak ona, sira iha fasilidade ne’ebé mak kompletu, sira nia oan mós eskola fatin di’ak hotu, sira la sente buat ida. (Lee notísia seluk iha Jornal Timor Post)
1,125 total views, 3 views today
Bele hare Video Seluk :