DILI (Timor Post)—Reprezentante povu iha uma fukun Parlamentu Nasionál, Deputadu Luis Roberto husi bankada Kmanek Haburas Unidade Nasionál Timor Oan (KHUNTO) husu ba Governu liuliu Ministériu Asuntu Parlamentár no Komunikasaun Sosiál (MAPKMS) atu regula mídia Partidu Polítiku (ParPol) sira.
Deputadu Luis subliña, presiza iha duni lei hodi regula atividade mídia partidu sira nian tanba durante ne’e nia observa mídia CNRT ho FRETILIN sempre ataka malu iha rede sosiál.
“Mídia barak mak iha Timor –Leste hodi hatún malu de’it, tarata malu, tolok malu. Ida ne’e atu lori povu ne’e ba ne’ebé,” atual Vise Prezidente Parlamentu Nasionál ne’e afirma iha nia intervensaun iha plenária Parlamentu Nasionál, Tersa (21/09/2021).
Nia hatutan, iha lei maka bele regura no garante informasaun sira ho kualidade no edukativu.
“Hatún malu de’it, lori lideransa ida hatún lideransa ida seluk, ami ida jerasaun foun ne’e ami haree hanesan kómiku ida ba ami, nusa akontese bei-beik hanesan ne’e, tuir loloos ne’e la tempu tiha ona, tempu para fó liman ba malu, para hadi’a agora,” Luis levanta kestaun ne’e bainhira Ministru Assuntu Parlamentar no Komunikasaun Sosiál, Francisco Jerónimo reprejenta governu akompaña plenária ba loron ne’e nian.
KHUNTO hanesan partidu foun, Luis hatete, hakarak iha lei atu regula hodi nune’e hotu-hotu hala’o kna’ar ho livre maibé mos iha responsabilidade.
“Se bele ami sira hanesan partidu foun laiha (mídia) ne’e, ami hakarak hanesan, mídia sira ne’ebé mak ita boot sira hari ne’e, hakarak hasai liafuan ne’ebé mak edukativu uitoan, para povu bele aprende,” Luis hatutan.
Luis dehan, governu iha podér toma responsabilidade ida ne’e atu labele husik mídia partidu polítiku sira.
“Ita fó livre bei-beik, entaun Timor neineik la’ós sai nasaun maibé sai fali hanesan suku ida ne’ebé mak hadau malu, istori malu, hatudu liman ba malu no la hatene atu lori povu ne’e ba ne’ebé,” Luis hatutan tan. (Lee notisia seluk iha Jornal Timor Post)
756 total views, 3 views today
Bele hare Video Seluk :