Jornalista Jaime Pires / Editór Noémio Falcao
DILI (Timor Post)—Governu liuhusi Ministériu Ensinu Superior Siénsia no Kultura (MESSK) fó fali liberdade ba universidade públiku no privadu iha rai laran hodi hala’o atividade normal hafoin semana rua liu ba taka tanba aplikasaun medida konfinamentu obrigatóriu ba prevensaun moras daet COVID-19 ho variante Delta.
Ministru Longinhos Dos Santos subliña, hahú husi loron 15/09/2021 universidade ida-idak bele bele hala’o fali atividade aprendizazen.
“Universidade sira atu graduasaun ne’e agora kompeténsia fali husi autónomu ida-idak ninian husi kada universidade,” Longuinhos ba jornalista sira iha Palásiu Governu, Dili, Kuarta (15/09/2021) hafoin partisipa iha Reuniaun Konsellu Ministru.
Governante ne’e hatete, durante ne’e governu suspende atividade prezensial no planu graduasaun sira hotu tanba númeru kazu COVID-19 sa’e maka’as iha rai laran liuliu iha Dili.
Maibé agora konfinamentu obrigatoriu jerál laiha ona, entaun universidade sira bele realiza ona sira nia atividade, maibé kontinua kumpre nafatin protokolu saúde, hanesan fase liman ho sabaun no distansiamentu sosial.
Desizaun ne’e MESSK foti bazeia ba autorizasaun husi Ministériu Saúde.
819 total views, 3 views today
Bele hare Video Seluk :
Subscribe to Timorpost
