Jornalista Luis Casimiro Lopes / Editór Noémio Falcão
Manufahi (Timor Post)—Médiku ne’ebé durante ne’e tau matan husu ba Prezidente Repúblika Francisco Guterres Lú Olo atu deskansa no provizoriamente labele hala’o viajen. Nune’e, Xefe Estadu adia nia vizita ba Manufahi iha loron Segunda (16/08/2021).
Fonte kredivel Timor Post konfirma Lú Olo isin manas no médiku sira halo mos teste kona-ba moras daet COVID-19 maske vasina ona doze daruak.
Entretantu Xefe Uma Sivíl Prezidénsia Repúblika, Francsico Maria Vasconselhos hatete, Prezidente Repúblika isin manas uitoan.
“Prezidente Repúblika (PR) la kansela ninia viajen maibé sei adia fila-fali,” Francisco informa bainhira ho ekipa avansadu to’o uluk iha Same.
Nia hatutan, planu vizita ba Manufahi feitu ona no preparasaun durante fulan haat.
“Maibé infelismente iha Sexta ne’e prezidente Repúblika sente isin manas oitoan maibé ohin dadersan ha’u atu sai prezidente hakarak mai maibé médiku mak rekomenda katak temporariamente lalikan halo viajen,” Francisco haktuir.
Maske Prezidente Repúblika adia nia vitiza maibé hato’o hela mensajen agradesimentu no husu deskulpa ba povu Manufahi tanba halo ona preparasaun.
“Prezidente laiha intensaun atu adia vizita iha dalan klaran tanba prezidente repúblika rasik hatene komunidade sira ninia preparasaun atu hodi simu ninia vizita,” Francisco subliña.
Maske nune’e, Xefe Uma Sivíl ne’e hatete, sei iha duni vizita husi Prezidente Repúblika ba Munisípiu Manufahi no Ainaro iha tinan ida ne’e nia laran.
711 total views, 3 views today
Bele hare Video Seluk :
Subscribe to Timorpost
