DILI (Timor Post)—Bebé Feto ida, to’o agora sei hela nafatin ho nia inan iha prizaun Gleno, hafoin partu iha tinan kotuk.
Diretór Estabelesimentu Prizaun Gleno, Nito do Santos, hatete Bebé feto ne’e moris iha loron 3 fulan Outubru 2020, no fulan Outubru tinan ida ne’e sei kompleta tinan ida hamutuk ho nia inan iha prizaun laran.
“Iha ne’e dadur feto na’in ualu, bebé feto ida, maibé bebé la’ós dadur nia hela ho nia inan tanba dadur, “nia dehan ba Timor Post via telefone, Tersa (10/08).
Nia haktuir, bebé nia inan (kondenada) daudauk ne’e kumpre hela pena prizaun tinan 3 fulan 5, maibé kona-ba kazu krime ne’ebé maka kondenada ne’e komete, nia parte labele fó sai ba públiku.
“Kona-ba krime ne’ebé mak kondenada ne’e komete ha’u labele kolia, tanba nee konfidensiál,” katak nia.
Entretantu, total prizioneiru sira ne’ebé kastigu iha prizaun Gleno hamutuk ema na’in 108 kompostu hosi mane na’in 91 no feto na’in 8.
Prizaun Gleno daudaun ne’e iha guarda prizaun hamutuk na’in 35, guarda hirak ne’e mak kontinua fó atendementu ba daus sira iha prizaun laran.
“Maski iha situasaun hanesan ne’e, ita limita família sira labele vizita tanba Covid-19, entaun ami na’in 35 sei halo asisténsia ida di’ak ba ita nia maluk sira ne’e,” dehan nia. (jxy)
770 total views, 3 views today
Bele hare Video Seluk :