Jornalista Jaime Pires / Editór Noémio Falcão
DILI (Timor Post)—Organizasaun Naun Governamental (ONG) Fundasaun Mahein (FM), husu ba Komandu Polísia Nasionál Timor-Leste (PNTL) atu foti medida rigorózu ba membru ida husi Unidade Patrullamentu Fronteira (UPF) ne’ebé fasilita membru Grupu Arte Marsial (GAM) hala’o movimentu ilegál iha fronteira terretres ho Repúblika Indonézia (RI).
“Ha’u hanoin da ne’e sei deskonfia, seidauk iha provas, seidauk iha faktus katak nia fasilita, maibé deskonfia. Entaun, ita husu komandu atu halo identifikasaun ba membru ne’ebé deskonfia fasilita ita nia sidadaun sira tama sai ilegál iha fronteira. Purtantu, bainhira iha identifikasaun maka haree katak, prova katak fasilita duni, hanoin katak tenke foti asaun ida ke rigor, liu-liu medida dixiplinar no medida kriminal”, dehan Diretór Ezekutivu FM, Joăo de Almeida, iha kna’ar fatin, Bairro dos Grilhos, segunda (09/08).
Nia subliña, iha medida dixiplinár nian mak inetrmus sansaun sira tuir regulamentu dixiplinár ninian, no medida kriminal, mak membru ne’e hanesan autoridade seguransa.
“Ida seluk hodi fasilita ita nia sidadaun sira tama sai legál iha fronteira, nu’udár aktu dozobidiensia ba regras sira ne’ebé estadu aplika hela iha situasaun pandemia ida ne’e, ne’e mak ami haree oinsá atu bele trata kestaun sira hanesan tama sai ilegal iha fronteira, liu-liu deskonfia elementu balu husi PNTL fasilita ida ne’e”, hateten nia.
Iha sorin seluk, Komandu PNTL, liuhusi Komandu Operasaun Nasionál, Superintendente Xefi Polisia, Pedro Belo dehan, kazu membru UPF fasilita sidadaun sira tama sai ilegál iha liña froteira, kabe ba komprténsia Komandante Jerál, Komisáriu Polisia Faustino da Costa nian.
Maibé, orientasaun husi Komandu PNTL, fó ordém klaru ba membru sira atu asegura ba ema hothotu, la’os fasilita fali ema seluk hodi hakat fronteira.
“Ha’u hanoin, ida ne’e kompeténsia Sua exelénsia Komandante Jerál nian, iha ordém klaru tiha ona, katak iha misaun ida ke klaru tebtebes iha polisia para atu asegura ba ema hothotu, la’os ba atu fasilita ema seluk. Ne’ebé sé de’it mak atu hato’o ba fali ba mete iha organizasaun, mete iha grupu, ninia prosesu la’o hela, dixiplinár la’o hela, ne’ebé kompeténsia sua exelensia komandante jerál sei halo prosesu tomak ba membru sira ne’ebé maka la loial ba instituisaun, la loail na estadu ida ne’e.
Tanba ne’e, prosesu ba membru UPF ne’e tenke la’o nafatin no sei laiha toleránsia ba membru sira, tanba membru sira ne’ebé komandu destaka ba iha liña fronteita terrestre, ho misaun atu asegura seguransa ba iha fronteira nian.
“Maibé, la’os ba atu tama fali iha grupu seluk. Nia atu fasilita, ita iha ona investigasaun tanba Sua Exelénsia Komandante Jerál ninia orientasaun klaru tiha ona ba iha departamentu justisa para atu bele investiga. Kuandu nia involve duni, maka nia tenke simu nia konsekuénsia. Tanba iha rezolusaun governu ne’ebé mak fo sai ona katak, ba PNTL no F-FDTL ne’e zero toleránsia ba iha membru ne’ebé maka involve iha arte marsiais”, nia afirma.
Bainhira membru PNTL ne’ebé hakarak involve iha atividade GAM, signifika nia maka lakohi hakarak atu vida polisia, no nia hakarak atu fila ba sivil (liur).
“Ne’ebé, ita hotu tenke fiar ba ita nia justisa, ita fiar katak Sua Exelénsia Komandu Jerál la nonook, la tama matan ba ema sira ne’ebé maka la loial ba instituisaun, la loial ba estadu ida ne’e”, hateten Belo.
Nune’e, dadaun ne’e Komandu PNTL liuhus Departamentu Justisa halo hela prosesu identifikasaun no investigasaun ba membru UPF ne’e, no hafoin remata ona mak sei bele hatene loloos nia konkluzaun.
“Ita tenke fó fiar ba ita nia investigasaun, kuandu remata ona, maka ita bele hatene katak nia involve duni ka lae. Sé nia la involve, nia nafatin serbisu. Mais kuandu nia involve, nia tenke simu nia konsekuénsia”, nia hakotu.
821 total views, 3 views today
Bele hare Video Seluk :