DILI (Timor Post) — Prezidente Organizasaun Kombatente Rezisténsia Nasionál, Norberto J.M. Espiritu Santo alias “Rolax Uatumau”, informa presiza adia dadus veteranu sira ne’ebé durante ne’e pendente husi 2009 to’o mai agora, tanba joven rezisténsia barak ladauk hetan benefísiu.
Prezidente OCRN ne’e husu nafatin ba Sekretáriu Estadu Veteranu atu bele hahú aselera prosesu verifikasaun dadus veteranu sira nian husi 2009 ne’ebé maka sei pendente hela.
Tanba tuir Norberto “Rolax Uatumau”, bainhira dadus 2009 mak la verifika joven rezisténsia lubun ida ne’ebé uluk partisipa funu iha vila laran ne’e la-bele hetan sira nia direitu, ate joven balu hein prosesu sira ne’e to’o lakon sira nia vida.
“Ha’u hanesan dirijente-Organizasaun husu nafatin ba Sekretáriu Estadu Veteranu tenke koordena ona ho konsellu veteranu sira tun ba halo verifikasaun dadus veteranu sira nian ne’ebé ulun pendente iha 2009 nian,” dehan Prezidente OCRN, Norberto “Rolax Uatumau” ba Timor Post iha nia servisu fatin Bebonuk, Sesta (30/07).
“Joven sira uluk se hela sira nia hirus matan iha vila laran, to’o agora sira nia luta seidauk hetan rekoñesimentu, balu hein ate a data balu lakon ona sira nia vida ladauk benefísiu ba sira nia direitu, ne’e labele kontinua hanesan ne’e,” Norberto “Rolax Uatumau” hatete.
Afirma, hahú husi loron ne’ebá Konsellu Veteranu sira iha servisu tomak oinsá atu halo re-verifikasaun ba dadus veteranu sira nian atu nune’e sira bele hetan sira nia direitu.
Tanba tuir sira nia haree durante komisaun omenajen sira nia servisu barak mak hamosu fallansu ne’ebé iha evidénsia balu ema nia moris iha tinan 1980, maibé ninia luta iha rezisténsia husi kedas 1975
Nune’e OCRN diskórdia ho Ministru Asuntu Antigu Kombatente Libertasaun Nasionál para atu halo re-verifikasaun ba dadus veteranu sira ne’e atu sira ne’e bele hetan sira nia direitu.
“Hanesan dados verifika válidu ne’ebé liu ona hatete, ema moris 1980, maibé nia tama iha Falintil envolve iha Rezisténsia 1975, I nune’e OCRN ka órgaun 8 diskórdia ho desizaun Ministru dos Asuntu Antigu Kombatente Libertasaun Nasionál (MAACLN), kona-ba Re-definisaun no Re-verifikasaun dados válidu ema Rezisténsia nian,” Norberto “Rolax Uatumau hatete.
Tanba ne’e, OCRN ka Órgaun 8 sujere bazeia Lei númeru 9, dia 29 de Jullu 2009 ne’ebé alitera husi Lei númeru 3, dia 12 de Abríl de 2006 kona-ba Estatutu Kombatente nian. I iha Kapítulu dispozisaun jerál artigu 1 e 2, mak kriasaun Komisaun ba Verifikasaun dadus ema Rezisténsia nian, mak Verifikaté sira presiza iha formasaun tékniku, hodi professionalize ba Verifikasaun dadus.
Entaun bainhira tun ba base hodi verifika loloos dados ema rezisténsia sira ne’ebé nia prestasaun servisu ba Estadu durante okupasaun ilegál Estranjeiru sira assume sai base legal hodi aprova.
“Estadu fó rekoñesimentu nu’udar Kombatente Libertasaun Nasionál nune’e mós liu husi formasaun tékniku ne’e bele antesipa artigu 20 kona-ba falsifika informasaun no dokumentu,” katak Norberto Rolax Uatumau”, nia subliña.
Tanba ne’e, OCRN ka Órgaun 8 propoin mós katak, atu verifikasaun dados ne’ebé sai kredivel, mak presiza envolvimentu Komandante no membru Rejiaun husi Talisma, Luar, Bivaque, Funu Nafatin, Nakroma, Haksolok, ho Asistente Polítiku Guerrilheiros, estafeta direta Komandu da Luta, Via Sentrais. Maibé ba membru referidu ba sira ne’ebé partisipa Luta ba Ukun Rasik-An, hahú 1975-1981 to’o 1993, husi órgaun luta nian hanesan CRRN, no CNRM, nune’e bele klasifika didi’ak prosesu luta nian, tanba sira ne’ebé envolvimentu ba iha luta hahú 1994 to’o 1999, husi órgaun luta nian, CNRT no FPl, mak tuur iha komisaun verifikasaun dados sei mosu falsifikasaun no inventa.(f10)
593 total views, 3 views today
Bele hare Video Seluk :