DILI (Timor Post) — Durante fulan Juñu 2021, Autoridade Inspesaun Fiskalizasaun ba Atividade Ekonómika, Sanitaria no Alimentár (AIFAESA) liuhusi inspesaun deteta operadór ekonómiku balun komete infrasaun ka fa’an sasán liu prazu.
Tanba ne’e, Inspetór Jerál AIFAESA, Ernesto Monteiro, hatete durante fulan ida hala’o inspesaun ba estabelesimentu hamutuk 81, deteta ida komete infrasaun ka fa’an sasán liu prazu.
“Infratór ne’e agora daudaun halo hela prosesu ba nia dokumentu iha parte jurídiku para halo investigasaun ba nia,” informa Ernesto Monteiro ba Timor Post iha knar fatin Kaikoli, Tersa (27/07).
Tanba ne’e, nia dehan, prosesu hotu sei iha parte jurídika hodi halo investigasaun molok fó sai rezulta loloos ba públiku. Tanba ne’e seidauk bele anunsia, katak komete infrasaun ne’e loja ka indivíduu. Maibé tipu de infrasaun mak fa’an sasán prazu.
Nune’e mós folin sasán iha merkadu, nia afirma, folin normal iha territóriu laran tomak. Maski iha preokupasaun husi munisípiu balun ne’ebé folin sa’e, liuliu ba material konstrusaun nian.
Aleinde ne’e, iha mós operadór ekonómika iha munisípiu Likisá hasa’e folin material konstrusaun nian, tanba ne’e sei submete ba iha Ministériu Públiku para bele prosesa ba oin.
Folin material konstrusaun sira ne’e, sa’e husi 20% to’o 150%, ka tuir loloos fa’an iha kapitál Dili ho folin $13.00 maibé sira fa’an ho folin $40.00, tanba ne’e prosesu sira ne’e submete ona ba Ministériu Públiku.
“Material konstrusaun, liuliu besi kuadradu ne’ebé ema fa’an iha Dili $13 ital, maibé nia fa’an to’o $40-resin, ho razaun ne’e iha hela prosesu hodi submete ba iha Ministériu Públiku,” esplika nia.
Ho nune’e, nia hatete, notifika operadór ne’e atu kumpre nia obrigasaun hanesan sidadaun, liuliu selu multa ka sansaun administrativu ruma.
Portantu, durante fulan ida ne’e, AIFAESA hala’o inspesaun iha fatin estabelesimentu hanesan loja 40, supermerkadu 7, loja konstrusaun 8, loja eletróniku 1, restaurante 9, massage 1, Talho 5, loja alimentár 9, no indústria alimentár 1, total hamutuk 81.(jho)
702 total views, 3 views today
Bele hare Video Seluk :
Subscribe to Timorpost
