DILI (Timor Post) — Ministériu Solidariedade Sosiál no Inkluzaun (MSSI), sei implementa programa foun “Bolsa da Mãe Jerasaun Foun” ba inan isin rua to’o bebe moris husi idade 0 to’o tinan neen (6).
Diretór Jerál MSSI, Rui Exposto, hatete MSSI sei reduz problema mal-nutrisaun no kiak ho programa Bolsa da Mae Jerasaun Foun, hahú husi inan isin rua to’o bebe tinan neen hodi kontribui ba gravidade pobreza no Objetivu Dezenvolvimentu Sustentavel (ODS).
“Objetivu mak, primeiru atu redus insidensia no gravidade ba pobreza ne’e rasik, kontribui ba ODS, no segundu hadi’a saúde no nutrisaun inan no labarik, hadi’a nutrisaun, ita haree husi inan ne’e isin rua to’o bebe tinan neen,” informa Rui Exposto, iha aprezentasaun ba programa Bolsa da mãe Jerasaun foun, hamutuk ho parseiru internasionál sira iha Ótel Timor, Kinta (22/07).
Se programa ne’e implementa iha tempu naruk, nia dehan, ne’e kontribui ona ba dezenvolvimentu kapital umanu no kresimentu ekonomia iha futuru.
Portantu, MSSI sei implementa bolsa da mae hahú hosi idade 0-6, ho osan $20 kada fulan, ho objetivu atu reduz problema mal-nutrisaun no kiak iha Timor-Leste. Programa ne’e sei hahu implementa iha munisípiu tolu; hanesan Bobonaru, Ainaro no Oekusi bazeia ba sensus 2015 nian.
Diretór Jerál MSSI n’e esplika, programa ne’e implementa atu reduz insidensia pobreza no hadi’a saúde nutrisaun inan no labarik nian tanba ko’alia kona-ba nutrisaun ne’e hahú kedas inan isin rua to’o partu.
“Programa ne’e foun, ita konsentra ba bolsa da mae jerasaun foun, la’ós bolsa da mae agora dadauk ejiste ne’e, ita investe uluk iha inan isin rua no primeiru infansia, subsídiu ba labarik ho defisiente fó tan adisional, sekarik inan ne’e partu no bebe ne’e moris ho kondisaun difisensia, entaun hetan tan subsídiu $10 adisional, tanba labarik defisiente la hanesan ho labarik sira ne’ebé moris ho normal,” dehan nia.
Nia hatutan, bolsa da mae antes ne’e iha $5 ba fulan ida maibé programa bolsa da mae jerasaun foun ne’e sei hasa’e ba fulan ida $15 ba inan isin rua ida to’o bebe ne’e moris hetan tan $5. Entaun totál $20 ba labarik ida, pagamentu sei halo kada fulan ida ou fulan tolu dala ida. Fo osan ne’e ho razaun katak inan isin rua bele sosa hahán nutritivu atu nune’e bebe ne’e labele hetan mal -nutrisaun
Kona-ba prosesu administrasaun, nia dehan, sei simplifika atu ema bele asesu ho lalais no programa ne’e rasik sei haree mós ho programa ministeriu sira seluk ba problema mal-nutrisaun nian.
“Ita kompila programa ne’e hamutuk ho programa linha ministerial sira seluk ne’ebé mak ligadu ho mal-nutrisaun no pobreza, nune’e sai forte liu ba atinji alvu ne’ebé ita hakarak no ita konsentra uluk ba etapa primeiru inan isin rua ho labarik ne’ebé moris hosi tinan 0-6,” diretór jerál ne’e katak.
Portamtu, parseiru sira mak, hanesan ILO, UNICEF, UNDP, WFP, Banku mundiál, ADB, PHD, embaixada Australia iha Timor-Leste, no seluk tan.)
Entretantu, Vise-Primeiru Ministru no MSSI, Armanda Berta dos Santos konvoka reuniaun hodi aprezenta programa Bolsa da Mãe jerasaun foun ba parseiru dezenvolvimentu sira hodi redús númeru pobreza iha Timor-Leste.
“Enkontru ohin importante tebes, ho objetivu atu ita bele haree hamutuk apoiu sira ne’ebé durante ne’e parseiru sira fornese dezde tinan naruk ona. Ita hakarak atu haree fali ho prioridade Governu nian sira seluk, no liu-liu ba programa protesaun sosiál, hodi aliña ho MSSI nia planu estratéjiku ba tinan fiskál 2021-2025, atu kontribui atinje planu estratéjiku dezenvolvimentu nasionál 2011-2030 no objetivu dezenvolvimentu sustentavel,” hatete Armanda iha nia diskursu iha salaun Ótel Timor, Kinta (22/07).
Iha oportunidade ida ne’e, nia aprezenta MSSI nia planu estratéjiku ida mak atu akomoda orientasaun polítika ne’ebé ligadu ba programa protesaun sosiál iha Timor-Leste ho pillar importante hanesan, kuidadu saúde báziku, previdénsia (bem estar) no asisténsia sosiál.
“Ministériu Solidariedade Sosiál no Inkluzaun nia programa ba tinan lima oin mai (2021- 2025), kuaze kobre pilares hirak ne’e ho programa prinsipál ualu, mak programa sistema integradu protesaun sosiál ba seguransa sosiál, programa asisténsia sosiál, programa reinsersaun no inkluzaun komunitaria, programa protesaun direitu ema ho defisiénsia, programa protesaun direitu labarik, programa kombate HIV/SIDA, programa reabilitasaun nasionál, no programa boa-governasaun no jestaun dezenvolvimentu”, Armanda katak.
Programa hirak ne’e, nia dehan, projeta atu atinje objetivu estratéjiku vizaun no misaun MSSI nian, hanesan asegura provizaun seguransa sosiál ba sidadaun Timor-Leste tomak, hamenus ki’ak no hamlaha no garante protesaun sosiál no justisa sosiál ba ema sira ne’ebé iha situasaun vulneravel iha Timor-Leste.
Portantu, MSSI nia papél haktuir PEDN mak estabelese sistema seguransa sosiál universál, liu hosi kontribuisaun ba servisu-na’in sira-hotu, asegura operasionalizasaun lei kuidadu labarik, Adosaun no orfanatu, asegura katak porsentu 40 hosi labarik ho defisiénsia partisipa iha ensinu báziku dezenvolve pakote rede seguransa sosiál ba família vulneravel sira.
“Ha’u hakarak hato’o agradesimentu ba biban sira ne’e tanba ha’u haree ona notas balun liu hosi enkontru tékniku sira ba apoiu parseiru sira ne’ebé durante ne’e hala’o kooperasaun ho MSSI ne’ebé la’o di’ak tebes, hahú kedas iha primeiru Governu konstitusionál, MSSI hetan ona apoiu hosi parseiru dezenvolvimentu sira hodi dezenvolve nia sistema protesaun Sosiál, iha kontestu internasionál,” Armanda agradese.
Nia afirma, kometimentu governu konstitusionál da-8 ne’ebé rekoñese papél importante ba redusaun pobreza iha Timor-Leste. MSSI hahú daudaun projeta reforma ba programa bolsa da mãe jerasaun foun hanesan instrumentu ida hodi tulun daudauk todan ne’ebé família balun enfrenta.
“Ita hotu hein, katak ho implementasaun programa bolsa da mãe jerasaun foun, bele hatudu impaktu ne’ebé pozitivu, liu-liu iha ámbitu redusaun pobreza, mellora rezultadu iha saúde, nutrisaun no edukasaun. Neineik no beibeik MSSI ho apoiu parte relevante sira bele lori Timor oan sira ba ambiente moris ho kondisaun bem estar ne’ebé agradavel,” nia hakotu. (jho/Pj8/Pj10/Pj15)
1,766 total views, 6 views today
Bele hare Video Seluk :
Subscribe to Timorpost
