DILI (Timor Post)—Primeiru Ministru Taur Matan Ruak, subliña, atake variante foun hanaran Delta obriga governu nia preparasaun ba situasaun mais pior tanba nasaun viziñu Indonézia infrenta dadauk atake ida ne’e.
Taur konsidera variante Delta iha ona odamatan oin, no poténsia boot invade Timor, tanba ne’e aleinde governu nia reparasaun, husu mós ba públiku nia kontribuisaun atu salva ema hotu iha rai laran.
“Variante delta ne’e iha tiha ita nia odamatan oin, se ita boot sira haree ita nia situasaun ne’e, evolusaun COVID-19 iha Indonézia influénsia boot ba ita nia situasaun rai laran, se ita boot sira haree iha tinan ida ne’e, Marsu mai oin ne’e, liu-liu NTT sa’e makaas, ita iha ne’e tama kedas ba kontajen komunitáriu,” Taur ba Jornalista sira hafoin deskuti assuntu ne’e iha reuniaun semanal ho Prezidente Repúblika Francisco Guterres Lú Olo, iha Palásiu Prezidensiál, Kinta (08/07/2021).
“Agora iha ne’ebá (indonézia) lockdown makaas loos, entaun ita mós tenke prevene katak, maski ita taka oinsá, nia bele tama, karik kuandu tama saida maka ita halo, ita tenke preparadu,” nia hatete.
Maski Taur informa, daudaun ne’e programa vasinasaun la’o di’ak, no númeru pozitivu COVID-19 iha Dili no fatin seluk hahú menus, maibé ida ne’e la’ós rezultadu ne’ebé halo timoroan sira kontente, mais kontinua halo prevensaun, enkuantu moras ne’e sei la’o hela.
“Ita hein buat ida maibé ita prepara aan ba buat aat, ba senáriu pior, porezemplu iha Indonézia no índia presiza oksijena problema, tama mai iha nee ita nia reasaun oinsá, naturalmente ita tenke enfrenta,” nia afirma.
“Tanba ne’e maka ha’u nia apelu ne’e sidadaun sira hotu, ita tenke prepara aan ba senáriu pior liu. Klaru ita kontente vasinasaun la’o di’ak, rezultadu COVID iha Dili no fatin seluk komesa tun. Ita mós labele halo festa uluk kuandu buat nee sei la’o hela,” nia enkoraja.
Antes hakotu, nia promete, governu sei haree medida prevensaun oinsá, maibé naturalmente indonézia sei lockdown, hanesan Jakarta, bali, NTT.
“Lockdown hotu, pelu faktu sira lockdown hotu, ida ne’e di’ak ba ita. Ita iha tempu badak ita sei haree, para halo nusa maka taka fronteira ne’e,” nia dehan.
Enkuantu husu kona-ba oinsá reasaun kona-ba variasaun foun ne’e, Taur hatán, PR preokupa ho variante foun ne’e.
“Ba asuntu ida ne’e prezidente preokupa loos ho variante foun ne’e agora iha Indonézia makaas, prezidente husu para tau matan nafatin fronteira no avansa ho vasina nee,” nia hakotu.
Iha parte seluk, Komandante Jerál Polisia Nasionál Timor-Leste, Komisáriu Faustino da Costa, hatete, Prezidente Repúblika Francisco Guterres Lu Olo mós husu ba polisia, nafatin asegura fronteira atu nune’e variante foun ne’e labele tama Timor.
“Prezidente husu mós, atu haree membru sira, fo hanoin membru sira para atu haree sira nia servisu,” nia hatete. (ven)
716 total views, 3 views today
Bele hare Video Seluk :