DILI (Timor Post)—Governu liuhusi Ministériu Ensinu Superior, Siénsia no Kultura (MESSK) nia Diresaun Unidade Koordenasaun Apoiu Estudante (UKAE) apoiu osan rihun $60 ba veteranu sira-nia oan hamutuk 47 hodi kontinua sira-nia estudu.
Koordenadora UKAE, Amelia da Silva Araújo, hatete estudante na’in-47 ne’ebé hetan apoiu husi governu kompostu husi rai laran hamutuk 42 no rai li’ur iha nasaun Indonézia na’in-1 no Portugal na’in-4 hamutuk 5.
Iha rai laran estudante sira mai husi universidade sira hanesan Institutu of Business (IOB) na’in-2, Institutu Superior Cristal (ISC) na’in-1, Universidade Dili (UNDIL) na’in-15, Universidade Orientál Timor Lorosa’e (UNITAL) na’in-4, Universidade da Paz (UNPAZ) na’in-2 no Universidade Nasionál Timor Lorosa’e (UNTL) na’in-18.
“Orsamentu ne’ebé alokadu ne’e purvolta 60 mill, ami apoiu kada nasaun la hanesan, iha Timor laran diploma 3 iha Dili laran ita fó $700, lisensiatura ita fó $.900,” nia hatete ba jornalista sira iha salaun MESSK-Kolmera, Kuarta (07/07).
Depois nia dehan, ba estudante sira iha rai li’ur hanesan Indonézia no Portugal ba lisensiatura governu apoiu kada estudante $6 mill ba tinan ida.
“Ita fó dala ida de’it ba sira ne’ebé finaliza ona, sira ne’ebé hanesan semester 3 ba leten kuandu simu ona osan nia tenke relata fali relatóriu mai halo avaliasaun depois mak kontinua,” nia esplika.
Nia haktuir, subsídiu ida ne’e ninia kritériu mak hanesan sidadaun Timor, tenke eskola ona iha universidade, karta ativu husi universidade, konta bankária, ninia valor ikus no seluk tan.
“Ami mensiona ona notas iha kontratu laran bainhira nia relatóriu hatama mai mak atinji notas ne’e bele kontinua, notas ba IPA tenke 2,75 no ba IPS tenke 3,0 ba leten,” nia hatete.
Iha fatin hanesan, reprezentante inan-aman Acácio Martins, agradese ba governu liuliu ministériu ensinu superior, siénsia no kultura, unidade koordenasaun apoiu estudante tanba konsidera veteranu sira-nia oan no fó subsídiu atu kontinua sira-nia eskola.
“Ami-nia moris loro-loron nia mak sura la to’o, ha’u atan agradese ba ministériu ensinu superior ne’ebé ajuda ami, tulun ami hodi fasilita ami-nia oan sira asesu iha edukasaun liuliu ensinu superior,” nia agradese.
Acácio husu ba governu liuliu ministériu ensinu superior, siénsia no kultura, atu kontinua nafatin programa subsídiu ba veteranu sira-nia tanba ohin loron veteranu barak mak sei moris iha susar laran labele sustenta oan sira.
Entretantu benefisiáriu Aniceto da Costa Marçal, hatete sente orgullu ho apoiu hosi MESSK tanba bele ajuda atu hakat liu ba pasu ida ne’ebé atu kompleta estudante iha nivel lisensiatura.
“Ha’u agora hakerek hela monografia, maibé haree sira públika sai subsídiu ida ne’e, entaun ha’u diretamente mai hatama ha’u-nia pedidu sira. Ohin loron ha’u-nia naran sai mak mai asina kontratu,” nia hatete. (Lee notisia seluk iha Jornal Timor Post)
1,478 total views, 3 views today
Bele hare Video Seluk :