(Jornalista Luis Casimiro / Editór Noemio Falcão
MANUFAHI (Timor Post) — Veteranu Tobias Magno alias “Maksakor” atuál Prezidente Konsellu Veteranus no Kombatentes Libertação Nasionál (CVCLN sigla Portugués) husu ba sidadaun hotu iha munisípiu Manufahi atu labele fiar informasaun falsu (Hoax) kona-ba vasina AstraZeneca.
Tobias Magno husu komunidade atu hakbesik-an ba sentru estabelesimentu hodi simu vasina AstraZeneca.
“Komunidade labele fiar informasaun hoax hosi media sosiál maibé tenke koopera hodi simu vasina nune’e bele livre ba movimentu,” dehan Maksakor ba jornalista iha eis Postu Same, Segunda (21/06).
Nia afirma, ema hotu tenke kumpre regras Organizasaun Mundial Saúde (OMS) no Ministériu de Saúde (MdS) tanba saúde mak hatene liu moras Covid-19.
“Maibé agora ita haree katak númeru vasinasaun ba vasina AstraZeneca sa’e kompara ho uluk ne’ebé ema la dun partisipa iha vasina tanba fiar hela ba informasaun (Hoax)”, nia dehan.
Fatin hanesan Diretora Sentru Saúde Munisípiu Manufahi, Florença Corte Real Tilman hatete, sidadaun sira vasina inklui jornalista tanba hanesan liña frente.
“Tanba ne’e profesionais saúde mai iha rádiu komunidade 1912 hodi halo vasinasaun ba jornalista sira ba iha segundu doze”, nia dehan.
Nune’e nia dehan, vasina refere la’ós de’it ba jornalista maibé inklui mós komunidade ne’ebé hakarak mai vasina.
“Ba maluk sira ne’ebé idade 60 no idade 18-59 inklui sira ne’ebé moras komplikadu bele simu hotu vasina ne’e no vasina sei la’o to’o komunidade sira hetan hotu foin para”, nia hakotu.
Tuir observasaun Timor post nota katak, sidadaun ne’ebé partisipa iha vasina ne’e hamutuk na’in 43 kompostu husi veteranus, funsionáriu públiku, komunidade no jornalista sira. (Lee Notísia Seluk iha Jornál Diáriu Timor Post)
737 total views, 3 views today
Bele hare Video Seluk :