Reportajen Jornalista Jeremias Soares/Editora Isabel Ermelita
DILI (Timor Post)—Governador Banku Sentrál Timor-Leste (BCTL), Abrão de Vasconcelos, informa nia parte la dekor montante fisku levantamentu orsamentu jeral estadu (OJE) tinan fiscal 2021 ba daruak nian ne’ebe banku halo tiha ona.
“Halo ona dala rua, ita boot sira hein relatóriu besik ona, laiha problema ho ida ne’e,” Governador Banku Sentrál, Abrão de Vasconcelos, informa asuntu ne’e ba jornalista sira iha Otél Novo Turizmu, kinta (17/06).
Entretantu, husu kona-ba kresimentu ekonómiku, Abrão hatete, iha tinan-2021 ne’e situasaun difisil oituan no iha fulan Abríl liubá, Banku Sentrál publika relatóriu annual 2020, situasaun oi-tuan mós difisil, konserta ninia risku prinsipál liu ne’e mak tanba ho pandemia covid-19.
“Mais ita sei iha territóriu pozitivu, kresimentu iha oi-tuan, mais la hanesan buat ne’ebé mak ita iha Novembru-Dezembru tinan kotuk, ne’ebé Banku Sentrál hanoin katak tinan ida ne’e remata, ita nia kresimentu ekonómiku bele atinje 3.4 porsentu, mais hare risku ne’ebé mak foin lalais implementasaun medidas relasiona ho atu kontein propagasaun covid-19, entaun ida ne’e implikasaun,” Abrão afirma.
Abrão hateten, ho implementasaun medida relasiona ho covid-19, ne’e mós aprezenta hotu dezafiu ba Governu atu implementa programa sira ne’ebé relasiona ho investimentu ekonomia.
“Tinan kotuk hanesan ita boot sira hatene, implementasaun lockdown, agora konserteza iha risku sira hanesan ne’e, la’ós ida ne’e de’it, mais ho implementasaun medida sira ne’e, aprezenta hotu dezafiu hanesan Governu atu implementa programa sira, liuliu investimentu ba programa sira ne’ebé mak hanesan presiza halo investimentu ekonomia,” Abrão aprezenta. (Notisia seluk bele lee iha Jornal Timor Post)
669 total views, 3 views today
Bele hare Video Seluk :