Reportajen Jornalista Jerimias Soares/Editor Isabel Ermelita
DILI—(Timor Post) Ajensia nasoens unidas ba programa mundial ai-han (WFP) apresia ho programa sesta bázika tanba konsidera bele asegura estabilidade ai-han iha rai laran no estimula agrikultór sira kuda ai-han barak liután.
Haree kona-ba situasaun estabilidade ai-han iha rai laran, Country Director WPF Timor-Leste, Dageng Liu, hateten iha tinan kotuk governu halo ona importasaun foos 30 mill tonelada husi rai li’ur, depois governu mós halo intervensaun ba programa sesta bázika.
“Programa ne’e di’ak tebes, para ita iha estabilidade ai-han iha rai-laran durante pandemia ida ne’e. Ho sesta bázika ne’e bele estimula ita-nia agrikultór sira atu kuda barak liu-tan, iha semana liu ba, ha’u mós partisipa koleta haree iha Manatutu, katak ida ne’e di’ak tebes para ita fó motivasaun ba ita-nia agrikultór sira atu kuda barak liu-tan,” Dageng informa ba jornalista sira, hafoin remata audiénsia ho Primeiru Ministru Taur Matan Ruak, iha rezidénsia xefe Governu, Faról, tersa (15/06).
Portantu, enkontru ne’ebe halo ho Primeiru Ministru Taur Matan Ruak ne’e, WFP informasaun kona ba sira nia apoiu hirak, hanesan iha area seguransa ai-han, nutrisaun no mós apoiu aviaun umanitáriu mai Timor-Leste.
“Ba oin, ami sei haree posibilidade, sera-ké WFP sei kontinua ninia vou-umanitáriu mai Timor-Leste ka la’e, depois de desizaun bainhira Primeiru Ministru hato’o ona, sei informa fila-fali mai ami,” Dageng afirma.
Enkuantu, dezastre natural 04 Abríl liubá, WFP mós tama hotu iha komisaun ne’ebé lidera husi Sekretáriu Estadu Protesaun Sivíl nian, hodi fó apoiu emerjénsia ba vítima sira ne’ebé sofre inundasaun. (Lee Notisia Seluk Iha Jornal Timor Post)
1,198 total views, 3 views today
Bele hare Video Seluk :