ADVERTISEMENT

Xanana: “Lolo Liman Ba Hirak Ne’ebé Presiza Tenki Sai Kultura Ba Timoroan”

Timor Post - Kultura
  • Share
Komunidade Aldeia 12 de Outobro Tasi Tolu Dili hato’o agradese ba Xanana ho ekipa ne’ebé susesu hadia estrada no supa sai bee iha Lagua Tasi Tolu hodi fasilita komunidade fila sira nia uma. (Foto Kontributor Timor Post)

DILI (Timor Post) – Lider Istóriku Kay Rala Xanana Gusmão dehan Timoroan sira tenke hatudu domin no fuan boot atu lolo liman apoia aihan bazika ba povu hirak ne’ebé presiza liu iha situasaun difisil tenki sai kultura ba Timoroan sira.

Liu husi komunikadu imprensa ne’ebé Timor Post simu tuir Xanana hateten, fó apoiu povu sira ne’ebé moris iha susar ne’ebé susar liu nu’udar jestu solidaridade tuir kultura no Igreja Katolia nia hanorin.

ADVERTISEMENT
SCROLL FILA BA NOTISIA


“Ba joven sira hanesan jerasaun foun, ita atu sai saida de’it, domin lolo liman ba ema ne’ebé presiza tenki sai kultura Timoro nian. Ida ne’e maka halo povu ne’e baku hirus matan, ó atu tuur iha loron matan ka fula ka iha ne’ebé de’it labele lakon domin, no lolo liman. Ida ne’e maka sei orienta imi joven sira too ami katuas sira ne’e mate tiha mós ami sei hamanasa lor-loron ho kontente haree imi lolo liman ba malu,” dehan Xanana Gusmão ba povu sira iha iha Aldeia 12 Outobru Lagua Tasi Tolu, Dili.

Xanana dehan, iha tinan 2020 liubá bainhira nia sosializa regra prevensaun moras COVID-19 haleu Timór, emprezariu, autoridade suku no joven balun konsolida sira nia fó forsa sosa aihan fahe ba ferik, katuas no hirak ne’ebé sofre moras difisensia nu’udar jestu domin.

Lee Mós :
Ai-fuan iha Australia Tinan Ne’e Laiha, Difisil Timoroan ba Servisu

Nune’e mós iha too fali iha dezastre naturál no inundasaun ne’ebé akontese iha loron 04 Abril 2021 liubá halo povu balun mate, uma mota sobu no lakon sasán uma laran, Timoroan kontinua tulun malu.

Xanana fó lembra hafoin inundasaun iha loron 04 no iha loron 8 Abril 2021, nia rasik organiza lia na’in sira halo rituál hodi hatuur bee dalan liu hosi apoiu empreza Timoroian supa sai bee lagua soe ba tasi hodi bele tulun povu sira ne’ebé sofre inundasaun iha Lagua I, II no III bele fila lalais ba sira nia hela fatin ho tempu fulan rua liu.

“Ha’u mai haree, tanba bee maka provoka imi nia terus, ema barak sei bele mai haree no fó tulun imi, imi sei kontinua hela iha tenda, tanba ne’e supa sai bee hodi hamenus ona bee para imi bele fila no hamoos imi nia uma,” dehan Xanana.

Iha parte seluk, Xanana husu povu Tasi Tolu no Na’I Padre sira atu labele hato’o agradese ba nia, maibé hato’o de’it agradese ba Na’I Maromak atu tulun nafatin empreza Timoroan sira hanesan, Sali Magun, BTK, Esperansa Timoroan (ETO/Gota), Wika, Incanto Weste, Timor Port, H2O no apreza seluk tan ne’ebé kuaze fulan rua apoia materiál no ajuda lori bee moos lor-loron ba povu sira.

Lee Mós :
Sentidu “ramos” ho “ger buti nor ai-noran” tuir kultura Mambae.

“Imi nia agradesimentu maka reza, husu ba Na’I Maromak tulun kompañia sira ne’ebé ajuda ita isin di’ak nafatin, tanba ema sira ne’e hatudu esperitu solidaridade makas tebes,”dehan Xanana.

Eis Prezidente Repúblika 2002-2007 Xanana mós kontente, durante fulan rua supa bee no no no dalan estrada sira ne’ebé tahu hetan partisipasaun masimu hosi ferik, katuas, joven no labarik hotu- hotu halo iha servisu popular lalin fatuk no rai hodi hadia estrada haleu Lagua I, II no III.

“Ha’u kontente tanba, labarik too ferik katuas no joven sira hotu- hotu, operador, kondutor no ekipa Team X ne’ebé hola parte maka ita bele halo servisu ne’e besik hotu ona,” nia agradese.

Iha fatin hanesan, Reprezentante Komunidade Aldeia 12 Outobro Tasi Tolu, Venancio Ximenes hato’o agradese ba eforsu Xanana ho ekipa ne’ebé hatudu domin hodi supa sai bee too povu ida-idak fila ba hamoos sira nia uma.

“Nu’udar povu ami akompaña durante avó tun direita hodi buka tuir nia povu ne’ebé sofre iha inundasaun iha situasaun difisil too ohin ita sente katak, ita moris fila fali ona. Ami sente katak, valór no domin ida ne’e ami selu labele, maibé ami nia orasaun husu nafatin ba Na’I Maromak no natureza akompaña no tulun nafatin av’o ho ekipa,” nia agradese.

Lee Mós :
Ahi han Uma Lisan Lalba Hakanek Etelvina Nia Isin

Venacio dehan, iha Timor-Leste lider barak loos, maibé uniku Xanana maka tun direita iha terrenu no vizita haree no responde direita povu nia sofrimentu sira.

“Avó individuál ida uniku hatudu hela ezemplu ba ami jerasaun foun, avó nu’udar aman ba progresu dezenvolvimentu,” nia agradese.

Entretantu, abitante Aldeia 12 Outobro Tasi Tolu mós simu vizita Xanana ba sira nia fatin ho dansa tradisionál no tara tasi hodi hato’o hato’o agradeseba servisu ateru rai ba uma hirak ne’e tahu.

Tuir planu, ekipa Team X sei termina servisu hadia estrada no hapara servisu supa bee iha loron 05 Juñu 2021, tanba abitante sira ne’ebé antes ne’e refujia komesa fila ona ba sira nia hela fatin.(Lee notísia seluk iha Jornál Timor Post)

 

 1,629 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Xanana: “Lolo Liman Ba Hirak Ne’ebé Presiza Ten…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No