(Reportájen José Mauno/Editor Suzana Cardoso)
DILI (Timor Post) – Atu fasilita subsidiu ba rekoperasaun ekonomia rai laran lao ho efetivu maka Governu Timor-Leste (TL) nia apoiu liu hosi Institutu Nasionál Seguransa Sosiál (INSS) hamutuk iha medida neen.
“Ohin ita bele hahú ona rejistu iha seguransa sosial. Maibé agora ita sei iha konfinamentu hela, ne’ebé institutu estabelese ona Whatt App no email. INSS sei simu liu husi meius sira ne’e,” hateten Prezidente INSS, Longuinhos Armando ba jornalista hafoin remata serimonia abertura apoiu subsidiu.
Notísia Relevante: MSSI Hahú Loke Rejistu Ba Subsídiu
Prezidente INSS Longuinhos esplika liutan, governu nia apoiu ba empregu sira iha medida neen. Medida dahuluk, subsídiu ba traballadór ho konta ema seluk nian. Medida daruak, depois ita iha subsídiu estraordináriu ba traballadór ho konta própriu, empreza individual no traballadór servisu doméstiku sira.
Medida datolu katak Longuinhos, sei fó dispensa kontribuisaun 6%. Medida dahaat subsídiu estraordináriu ba dezempregu. Medida dalima subsídiu estraordináriu ba eletrisidade. No medida daneen subsídiu estraordináriu ba renda.
Durasaun tempu ba rejistu empregu ne’e katak Prezidente INSS Longuinhos, durante loron 15. Hahu hosi loron 10 to’o loron 25 Fulan Maiu Tinan 2021. Tanba vigor ona iha dekretu lei númeru 8/2021 de 3 Maiu iha artigu 3 katak; rejistu ba subsídiu ne’e durante loron 15 depois de lei ne’e vigor.
“Agora medida la hanesan ho ninia persentajen. Subsídiu estraordináriu ho konta rasik ita apoiu 70%. Subsídiu estraordináriu ba traballadór ho konta própriu, empreza individual traballadór servisu doméstiku ita apoiu 85%,” dehan Longuinhos hodi hatutan.
Subsídiu estraordináriu ba dezempregu 40%. Subsídiu estraordináriu ba eletrisidade 50%. No subsídiu estraordináriu ba renda 30%. Dispensa ba kontribuitivu baibain 6%. Orsamentu ne’ebé mak INSS propoin ba apoiu ho medida neen ne’e hamutuk juta U$45.3, mak sei aloka ba fo subsidiu.
Konaba motorista sira katak Prezidente INSS, motorista sira mai tenki ho kritériu. Tenki iha karta kondisaun. Tenki transporte públiku. La’ós mai ho transporte privadu. Ne’e pontu importante ba motorista sira.
Longuinhos dehan, INSS sei tolera karta kondisaun mate iha tempu serka sanitáriu. Maibé iha tinan 2019 ba kraik sei la tolera. Tuir dadus ne’ebé rejista ona iha INSS, daudaun ne’e motorista kauze 300-resin mak simu ona apoiu husi motorista kuaze 600-resin ne’ebé rejistu ona.
“Traballadór sira bele mai iha INSS. Ami prontu atu esplika kle’an kritériu hirak ne’e. Tanba servisu doméstiku sira ita sei iha grau komesa husi 1 to’o 10. Boot liu mak U$300.00. No ki’ik liu mak U$115.00. Nune’e traballador sira tenki mai para hetan esplikasaun. No sira hakarak hili ida ne’ebé,” sujere Prezidente INSS Longuinhos.(Lee notisia seluk iha jornál Timor Post)
768 total views, 3 views today
Bele hare Video Seluk :
Subscribe to Timorpost
