(Reportájem Jaime Pires/Editor Suzana Cardoso)
DILI (TIMOR POST)- Hafoin Lider Nasional, Kay Rala Xanana Gusmão halo asaun toba iha Vera Cruz durante kalan rua hodi defende vitima mate isin deskunfia Covid-19, Armindo Borges (66), World Health Organization (WHO) entrega dokumentu protokoler hakoi mate isin Covid-19 ne’ebé bele lao tuir tradisaun no relijiaun.
“Ohin Señór ida husi WHO nia mai entrega karta ida, buat hotu-hotu kona-ba Covid-19 nian,” hateten Lider Nasional Xanana ba jornalista iha Izolamentu Vera-Kruz, Kuarta, (13/4/2021), hafoin simu karta husi reprezentante ONU husi WHO no Ministra Saúde, Odete Belo.
Timor Post (14/04/2021)- Líder Karismatiku, Kay Rala Xanana Gusmão hatete, ohin WHO lori karta ida mai katak, ema mate ba Covid-19 bele entrega ba família hodi hakoi.
Xanana esplika, iha karta ne’e ko’alia kona-ba prevensun Covid-19 no ema mate ba Covid-19 bele hakoi tuir kultura no relijiaun nian. Maibé, tenki tuir nafatin protokolu WHO nian.
Tanba ne’e lider karistimatika ne’e husu nafatin atu povu Timor-Leste atu kontinua respeitu nafatin regras prevensaun Covid-19 ne’ebé mak hadaet ona mai too iha Timor-Leste.
“Ne’e duni se mak mate ba Covid-19 bele halo tuir buat sira ne’e hotu. Maibé tuir regra hodi labele transmiti ba ema hotu-hotu,” husu Xanana hafoin lee karta WHO nian ne’e.
Xanana deklara, ba família no seguransa nomos ba vitimia sira tenki kumpri norma hotu-hotu, inklui dignidade ema ne’ebé mak mate ona. Tenke respeitu ema ne’ebé mate ne’e.
Esplika Xanana, iha karta ne’e buat sira ne’e kompletu hotu ona. Katak ema ne’ebé mak mate ba Covid-19 bele entrega ba família, maibé sira husu mak kontinua tuir protokolu WHO nian. Tanba ne’e ema ne’ebé mak mate ba Covid-19 bele hakoi tuir nia lisan, kultura no relijiaun ida-idak ninian.
Antes ne’e tuir observasaun Timor Post hateten, Ministra Saúde, Odete Belo ho Reprezentante ONU husi WHO mai hasoru eis Prezidente Repúblika, Kay Rala Xanana Gusmão iha Izolamentu Vera Cruz, Kuarta, (14/4/2021) maizu menus tuku 8:00 dader.
Hanesan públika tiha ona, Xanana halo asaun protesta ba Governu hafoin hetan keixa husi familia Matebian Armindo Borges ne’ebé iha Domingu, (11/4/2021) iha Hospital Nasional Guido Valadares (HNGV), liu oras balun deit maka tranfere mai Izolamentu Vera Cruz fatin ba Pasiente Covid-19. (Lee Notisia Kompletu Iha Diáriu Timor Post)
1,139 total views, 3 views today
Bele hare Video Seluk :