Timor Post (08/03/2021)—Pasiente COVID-19 hamutuk na’in-35 inklui kazu foun-7 husi Tasi Tolu ho Bebonuk ne’ebé ekipa médiku izola iha Sentru Saúde Vera Kruz sira hotu nia kondisaun saudavel.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Doutór Rui Maria de Araújo haktuir, pasiente hirak ne’e laiha ida mak hetan sintomas mear no isin manas.
Liuhusi konferénsia ba imprensa iha Sala Situasaun-Sentru Integradu Jestaun Krize (SS-SIJK), segunda lorokraik ne’e haktuir, kazu foun neen husi Tasi Tolu no ida iha Bebonuk ne’e, ekipa kontinua halo servisu iha terenu hodi identifika kontaktu husi agrupamentu ne’e liuhusi foti amostra ba komunidade sira iha fatin rua ne’e no fatin seluk ne’ebé iha ligasaun.
“Ekipa konjuntu kontinua buka tuir tan kontaktu hosi agrupamentu hirak ne’e, maibé balun ekipa foti amostra ona , hein rezultadu tuir mai,” Doutór Rui subliña ba Jornalista sira.
“Agora ita konfirma katak Timor Leste iha cluster rua, maibé ekipa konjuntu nafatin buka indísiu primáriu ne’e hosi nebe, mas ita seidauk too iha konkluzaun katak ita seidauk iha tranzmisaun komunitariu, tanba kazu hirak ne’e iha ligasaun ho kazu ida ne’ebé ita deteta iha Baukau ,” Doutór Rui salienta.
Tanba ne’e, Eis Primeiru Ministru ne’e husu ba sidadaun hotu iha rai laran liuliu iha Dili atu tuur hakmatek atu kontinua halo tuir regra komfinamentu ne’ebé governu deklara ona liu hosi Konsellu Ministru.
Governu liuhusi reuniaun Konsellu Ministru foti ona desizaun hodi implementa medida serka sanitaria no konfinamentu obrigatóriu iha sidade Dili duran loron-hitu hahú husi loron Tersa (09/03/2021) to’o loron Segunda (15/03/2021).
Hafoin reuniaun Konsellu Ministru, Ministru Prezidénsia Konsellu Ministru (MPKL) Fidelis Leite Magalhães haktuir, desizaun ne’e governu foti tanba transmisaun lokal moras daet COVID-19 iha Dili laran.
Fidelis dehan, tanba tuir regra serka sanitaria durasaun ba loron hitu maka depois de prazu ida ne’e maka governu sei halo fali desizaun bazeia ba dezenvolvimentu situasaun atuál iha rai laran liuliu iha munisípiu Dili.
Durante serka sanitaria, Fidelis subliña, bandu ema halo viazen sai husi Dili ba munisípiu seluk exeptu ekipa sira ne’ebé transporta aimoruk, aihan no seguransa.
“Maibé só iha autorizasaun husi ministériu interior no husi Sentru Integradu Jestaun Krize (SIJK),” Fidelis hatete.
Nia hatutan, ba sira ne’ebé husi munisípiu seluk no rejidente iha Dili, sira bele tama mai Dili maibé tenke relata ba SIJK no kumpri konfinamentu obrigatóriu.
Konsellu Ministru mós deside atu labele halo atividade kulturais, reliziosa no atividade sira ne’ebé halibur ema barak durante periodu serka sanitaria iha Dili.
Fidelis dehan, konsellu ministru mós bandu atu komunidade sira sai husi um aba fatin públiku sira bainhira laiha nesesidade.
“A não ser nesesidade urjente sira hanesan ba hola aihan ou hola eletrisidade ou hola medikamentu sira, maibé la’o iha númeru kiik no bainhira pesoal seguransa sira halo para karik tenke justifika,” Fidelis salienta.
Atividade eskola no merkadu sira sei hatúr tuir despaixu husi parte relevante sira sei fó sai.
“Konklui katak atvidade hotu sei paradu durante loron hitu ne’e nia laran,” Fidelis subliña.
Jornalista Olga Soares
Editór Noémio Falcão
696 total views, 3 views today
Oinsa Ita nia Reaksaun iha Notisia Nee?
You have reacted on “Pasiente COVID-19 Na’in-35 iha Sala Izolamentu …”
Bele hare Video Seluk :
Subscribe to Timorpost1
/
1936
EMBAIXADÓR MALÁZIA ENSERA WORKSHOP EDUKASAUN KOMPRENSIVU
PARTIDU KMANEK HABURAS UNIDADE NASIONAL TIMOROAN. (KHONTO) REALIZA KONGRESU NASIONAL BA DALA HA'AT
#GOVERNURONA - PROSESU IMPLEMENTASAUN DEZENTRALIZASAUN
1
/
1936
