Timor Post (13/01/2021)—Autoridade Aeroportu no Navegasaun Aérea Timor-Leste (ANATL. EP) no parte saúde klarifika, aviaun ne’ebé tún iha Aeroportu Internasionál Nicolau Lobato, Komoro, Dili ne’e tulan duni ema na’in-5 no hetan lisensa mak tún.
Vise Ministru Saúde, Bonifácio Maukoli dos Reis dehan, husi ema na’in-lima iha aviaun laran ne’e inklui médiku na’in-rua, pasiente moras COVID na’in-1 no pilotu ho ko-pilotu.
Aviaun Australia ne’e semo ba tula pasiente ida iha Jakarta fila ba Australia maibe tún iha Aeroportu Internasionál Nicolau Lobato, Komoro, Dili, Tersa (12/01/2021) iha oras, tuku lima lorokraik.
Prezidente Administrasaun ANATL. EP), José Trindade da Cruz Pinto klarifika, ANATL la fó lisensa ba aviaun tún iha aeroportu bainhira situasaun normal. maibé aviaun ida ne’e pilotu sira husu atu tún emerjénsia tanba aviaun nia kondisaun hasoru difikuldade inklui tenke atesta fali mina.
“Iha situasaun difisil, nia kuandu husu ida ne’e ita tenke fó. Maibé autorizasaun ida ne’e la’ós mai husi ANATL maibé AACTL,” José subliña hodi hatutan, autorizasaun ne’e ho rajaun katak aviaun ne’e tún hodi rejolve kedas difikuldade ne’ebé iha no semo fali kedas.
Maske nune’e, José haktuir, bainhira aviaun ne’e tún iha Aeroportu Komoro, Aviaun nia roda kuak tan, tanba ne’e aviaun labele semo kedas fali i halo ona kontaktu ho autoridade husi Austrália tenta autoriza aviaun seluk hodi halo evakuasaun ba pasajeirus ne’ebé iha aviaun laran, maibé tuir informasaun husi Austrália rasik katak klima iha ne’eba seidauk permite.
Entretantu Vise Ministru Saúde hatete, nia parte buka hela solusaun liuliu haree ba pasiente ne’ebé iha aviaun laran. Nia dehan, presiza iha desizaun koletivu ida bainhira seidauk halo evakuasaun pasiente ne’e ba Austrália.
“Sé karik demora, nu’udar saúde, kaer ba umanidade, foti pasiente ne’e lori ba iha izolamentu. Maibé sira (médiku sira iha aviaun laran red) la autoriza, sira hakarak nafatin iha ne’e (aeroportu),” Governante ne’e hatete.
Nia hatutan, husi parte WFP maka halo ona koordenasaun no tenta ba monta temporariu tenda no toilet hodi halo atendimentu ba pasiente, tanba pasiente ne’e nu’udar diplomata ida ne’ebé servisu iha ajensia internasional WFP. (res/cao)
715 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
1
/
1948
BOMBEIRUS SELEBRA ANIVERSARIU BA DALA 24
ME HAMUTUK HO UNFP LANSA FASILIDADE KUIDADU SAÚDE IHA ERMERA
APS SEI MONTA TAN POSTU BOMBEIRUS IHA FATIN 7
1
/
1948